‎Ikipe y'Igihugu ya Argentine yakatishije itike yo gukina imikino ya 1/2 cy'Igikombe cy'Isi nyuma yo gusezerera u Busuwisi ibutsinze ibitego 3-1 mu minota 30 y'inyongera.
‎
Iyi ntsinzi yabonetse bigoranye yatumye bazacakirana n'u Bwongereza mu mukino uteganyijwe ku wa Gatatu.
‎
‎Argentine ni yo yabanje gufungura amazamu ku munota wa 10 binyuze kuri Alexis Mac Allister watsindishije umutwe mbere y'uko Dan Ndoye yishyurira u Busuwisi ku munota wa 67.
‎
Umukino wahinduye isura ubwo u Busuwisi bwasigaraga ari abakinnyi 10 mu kibuga nyuma y'ikarita itukura yahawe Breel Embolo azize kujijisha umusifuzi ku ikosa byasaga nk'aho yakorewe na Leandro Paredes, umusifuzi amuha ikarita ya kabiri y'umuhondo yabyaye itukura.
‎
‎Iminota isanzwe y'umukino yarangiye amakipe yombi anganya igitego 1-1 biba ngombwa ko hongerwaho iminota 30 kugira ngo haboneke uwegukana intsinzi.
‎
Ku munota wa 112 Julián Álvarez yatsinze igitego cya kabiri cya Argentine yifashishije ishoti rikomeye yatereye inyuma y'urubuga rw'amahina.
‎
Lautaro Martínez yashyizemo agashinguracumu mu minota ya nyuma y'inyongera, atsinda igitego cya gatatu ku mupira wari ugaruwe n'umunyezamu nyuma y'ishoti ryari ritewe na Thiago Almada.
‎
‎Uyu mukino wa 1/2 uzahuza Argentine n'u Bwongereza ugiye gukinwa nyuma y'imyaka 40 habaye amateka adasanzwe y'igitego cya Diego Maradona kizwi nka 'Hand of God'.