Ikipe y'Igihugu ya Argentine yakatishije itike yo gukina umukino wa nyuma w'Igikombe cy'Isi nyuma yo gusezerera u Bwongereza ibutsinze ibitego 2-1 muri 1/2.
Iyi ntsinzi yabonetse mu minota ya nyuma y'umukino ku buhanga bwa Lionel Messi watanze imipira yavuyemo ibitego byombi.
Uku gusezererwa gushyize iherezo ku nzozi z'u Bwongereza bwashakaga igikombe buheruka mu 1966, bukazahatanira umwanya wa gatatu n'u Bufaransa.
U Bwongereza butozwa na Thomas Tuchel ni bwo bwabanje gufungura amazamu ku munota wa 55 binyuze kuri Anthony Gordon wahawe umupira mwiza na Morgan Rogers.
Ibyishimo by'Abongereza byarangiye habura iminota itanu ngo umukino urangire ubwo Enzo Fernandez yishyuraga iki gitego ku ishoti rikomeye yatereye inyuma y'urubuga rw'amahina.
Ku munota wa 92 Lautaro Martinez yashyizemo agashinguracumu, atsindisha umutwe umupira wari uhinduwe na Messi, ahita aha intsinzi igihugu cye.
Mbere y'uko Argentine yishyura u Bwongereza bwari bwokejwe igitutu bikomeye kuko Alexis Mac Allister yateye amashoti abiri akubita ku giti cy'izamu.
Umutoza Thomas Tuchel yashyizwe mu majwi kuba yatumye ikipe ye isatirwa cyane ubwo yakuraga mu kibuga rutahizamu Gordon akinjiza myugariro Ezri Konsa na Dan Burn kugira ngo yugarire.
Uku gusubira inyuma k'u Bwongereza kwatumye Argentine ibona umwanya uhagije wo kotsa igitutu izamu rya Jordan Pickford kugeza ibonye ibitego bibiri.
Iyi ntsinzi yahesheje Argentine amahirwe yo gushaka kwisubiza igikombe yegukanye mu 2022, aho izahura na Espagne mu mukino wa nyuma. Uyu mukino wa nyuma uzahuza Lionel Messi w'imyaka 39 ukomeje kwandika amateka ndetse n'abakinnyi bakiri bato ba Espagne barimo Lamine Yamal.
