Ikipe ya Manchester City yegukanye igikombe cya FA Cup  nyuma yo gutsinda Chelsea igitego 1-0 ku mukino wa nyuma wabereye kuri Wembley Stadium kuri uyu wa Gatandatu.16.05.2026.

Uyu mukino watangiye amakipe yombi atinyana ku buryo bafunganye cyane noneho bakerekana urwego ruri hasi mu buryo bwo kurema amahirwe, amakipe yombi agaragaza kwitwararika cyane. Gusa Manchester City yagaragaje ubushobozi bwa bakinnyi  no gukoresha neza amahirwe make yabonye, ibintu byayifashije  kongera igikombe cya FA Cup ku cya Carabao Cup yatwaye itsinze arsenal muri uyu mwaka 

Igitego rukumbi cyabonetse muri uyu mukino cyatsinzwe na Antoine Semenyo ku munota wa 72, nyuma yo guhabwa umupira mwiza na Erling Haaland. Semenyo yatsinze igitego cyiza cyane  kuburyo  umunyezamu Robert Sánchez wa Chelsea ntakindi yari gukora.

Ku ruhande rwa Chelsea, iyi ntsinzwi yababereye igihombo gikomeye kuko ibaye inshuro ya kane yikurikiranya itsinzwe umukino wa nyuma wa FA Cup. Ibi kandi bisize iyi kipe isoje umwaka nta gikombe yegukanye.

Chelsea football club imaze imyaka ikabakana 6 idatsinda Manchester city mu marushanwa yose .iheruka gutsinda Manchester city tariki ya 29 Gicurasi 2021 ku mukino wa nyuma wa UEFA Champions League Final wabereye i Porto muri Portugal. Chelsea yatsinze City 1-0 igitego cyatsinzwe na Kai Havertz. 

Naho muri Premier League, Chelsea iheruka gutsinda Manchester City tariki ya 8 Gicurasi 2021 ku kibuga cya Etihad, iyitsinda 2-1.

Umutoza Pep Guardiola yongeye kwerekana ubushobozi bwo kuyobora ikipe mu mikino ikomeye, nubwo uyu mukino utari urimo ubuhanga bwinshi busanzwe buranga Manchester City.

Semenyo, wageze muri Manchester City avuye muri Bournemouth muri Mutarama , yakomeje kwigaragaza nk’umukinnyi ufite impano idasanzwe ndetse uri gufasha cyane iyi kipe muri uyu mwaka