‎Ishyirahamwe ry'Umupira w'Amaguru mu Rwanda (FERWAFA) ryashyize hanze ibiciro by'amatike y'imikino ya gicuti y'irushanwa mpuzamahanga rya "FIFA Series 2026", riteganyijwe kubera mu Rwanda kuva tariki ya 26 kugeza ku ya 30 Werurwe 2026, aho itike ya make ari 2000 Frw.

‎

‎Iri rushanwa rigiye kubera mu Rwanda bwa mbere, rizatangira mu gihe Ikipe y'Igihugu 'Amavubi' itarabona umutoza mukuru. Imikino izakinirwa kuri Stade Amahoro no kuri Kigali Pelé Stadium, ikaba igabanyije mu matsinda abiri ari yo Itsinda A n'Itsinda B.

‎

‎Ku mikino izabera kuri Stade Amahoro izakira Itsinda A ririmo u Rwanda, Estonia, Grenada na Kenya, itike ya make mu myanya isanzwe yaba hasi cyangwa hejuru yashyizwe ku 2000 Frw. 

‎

Abazicara mu myanya iri iruhande rwa VIP (ibice bya 105, 106, 140 na 141) bazishyura 5000 Frw, naho muri VIP ho akaba ari 30,000 Frw. Imyanya y'icyubahiro ya VVIP na Skybox yagenewe abatumirwa gusa.

‎

‎Ku bindi bibuga, imikino izabera kuri Kigali Pelé Stadium izakira Itsinda B ririmo Tanzania, Macau, Aruba na Liechtenstein, itike yo mu myanya isanzwe izaba ari 2000 Frw, naho mu myanya y'icyubahiro (VIP) ibe 30,000 Frw. Nk'uko byagenwe kuri Stade Amahoro, imyanya ya VVIP na ho yagenewe abatumirwa. 

‎

FERWAFA yatangaje ko itike imwe izajya iha umuntu uburenganzira bwo kureba imikino yombi iteganyijwe kuri uwo munsi ku kibuga yaguriyeho.

‎

‎Kugura amatike byatangiye hakoreshejwe uburyo bw'ikoranabuhanga, aho ushaka itike akanda *939*3*2# cyangwa agasura urubuga rwa www.sportspass.rw.

‎

 FERWAFA yasabye abakunzi b'umupira w'amaguru kugura amatike hakiri kare kugira ngo batazacikanwa no gushyigikira Ikipe y'Igihugu.

‎

‎Uko imikino izagenda ikurikirana, irushanwa rizafungurwa n'imikino yo mu Itsinda B izabera kuri Kigali Pelé Stadium ku wa 26 Werurwe, aho Aruba izakina na Macau saa Saba n'Igice z'amanywa, igakurikirwa n'umukino uzahuza Tanzania na Liechtenstein saa Kumi n'Igice.

‎

‎Imikino yo mu Itsinda A izabera kuri Stade Amahoro ku wa 27 Werurwe, izabimburirwa n'uzahuza Kenya na Estonia saa Kumi n'Ebyiri z'umugoroba (18:00), mu gihe Amavubi y'u Rwanda azakina umukino wawo wa mbere ahura na Grenada saa Tatu z'ijoro.

‎

‎Nyuma y'iyi mikino ibanza, hazakurikiraho imikino izahuza amakipe yatsinze hagati yayo ndetse n'ayatsinzwe mu matsinda yombi. Iyi mikino ya nyuma izabera kuri Kigali Pelé Stadium guhera saa Cyenda n'undi wa saa Kumi n'Ebyiri, ndetse no kuri Stade Amahoro saa Kumi n'Ebyiri n'undi wa saa Tatu.