‎Amakipe ya Police VC mu bagabo na APR WVC mu bagore yatangiye yerekana ubukana mu mikino ya nyuma ya kamarampaka (Playoffs) ya Shampiyona y’Icyiciro cya Mbere muri Volleyball y'umwaka wa 2025/26, nyuma yo kwegukana intsinzi mu mikino ya mbere yabereye muri Petit Stade i Remera kuri uyu wa Gatatu tariki ya 1 Mata 2026.

‎

‎Iyi mikino yitabiriwe n'abafana benshi ndetse na Minisitiri wa Siporo, Nelly Mukazayire, ifite umwihariko kuko amakipe agomba gutanguranwa intsinzi eshatu mu mikino itanu ishoboka (Best of 5) kugira ngo yegukane igikombe cya Shampiyona.

‎

‎Mu cyiciro cy'abagabo Police VC yari yatsindiwe ku mukino wa nyuma mu mwaka ushize yigaragaje cyane imbere ya REG VC, iyitsinda amaseti 3-0 biyoroheye (25-18, 25-21, 25-23).

‎

‎Iyi kipe y'Igipolisi cy'u Rwanda yubakiye umukino wayo ku bakinnyi barimo Makuto Elphas na Angiro Gideon, mu gihe REG VC yagowe no kwinjira mu mukino kubera ko inkingi za mwamba zayo nka Thon Maker Madol Magembo na Gisubizo Merci batari mu bihe byabo byiza.

‎

Ikibazo cya REG VC cyahumiye ku mirari mu iseti ya gatatu ubwo umukinnyi wayo wo hagati Sam Engwau yagiraga imvune y'akagombambari agasohorwa mu kibuga igitaraganya.

‎

‎Ku ruhande rw'abagore, APR WVC yatozwaga bwa mbere na Justin Kigwaria nyuma y'uko iyi kipe itandukanye na Kamasa Peter yihimuye kuri Kepler WVC yari iherutse kuyitsinda mu mikino yo kwishyura.

‎

APR WVC yatsinze amaseti 3-0 (25-16, 25-20, 25-21) ibifashijwemo no kugarira neza imipira ya Binta Fatoumata Bah usanzwe ari mwe mu bakomeye Kepler WVC igenderaho mu busatirizi bwayo.

‎

‎Mbere y'iyi mikino ya nyuma habanje kuba imikino yo guhatanira umwanya wa gatatu.

‎

Mu bagore Police WVC ifite igikombe giheruka yatsinze Rwanda Revenue Authority (RRA) amaseti 3-0 (25-18, 25-21, 25-15), naho mu bagabo Kepler VC itsinda Gisagara VC itari ifite Malinga Kathbath kubera imvune, amaseti 3-1 (21-25, 25-17, 25-22, 25-15).

‎

‎Imikino ya nyuma irakomeza kuri uyu wa Gatandatu tariki ya 4 Mata 2026 hakinwa umunsi wa kabiri nabwo muri Petit Stade.