Ikipe ya Police VC yanditse amateka akomeye muri Volleyball y'u Rwanda ubwo yatsindaga REG VC amaseti atatu kuri imwe, igahita ibona itike yo gukina umukino wa nyuma wa Shampiyona Nyafurika ihuza amakipe yabaye aya mbere iwayo mu bagabo (CAVB Men’s Club Championship 2026).
Iri rushanwa riri gukinirwa i Kigali ku nshuro ya 47 ryasize Police VC ibaye ikipe ya mbere yo mu Rwanda igeze kuri iki cyiciro nyuma y'umukino wa kimwe cya kabiri wari utegerejwe cyane wabereye muri BK Arena ku wa Gatanu, tariki ya 1 Gicurasi 2026.
Iyi kipe y'Igihugu ya Polisi itozwa na Musoni Fred yatangiye yitwara neza yegukana iseti ya mbere ku manota 25-20, gusa REG VC yari iyobowe n'umutoza Mugisha Bavuga Benon iza kwisubiraho igaruka mu mukino, iyishyura mu iseti ya kabiri yayitwaye ku manota 25-22.
Umukino wakomeje kurangwa no gukaza serivisi n'ubwugarizi ku ruhande rwa Police VC, byatumye REG VC ikora amakosa menshi arimo no kwica reception. Ibi byahaye icyuho Police VC irayobora, ibifashijwemo na Matheus Bettim hamwe na Makuto Elphas, itsinda iseti ya gatatu ku manota 25-17.
Iseti ya kane yasabaga amakipe yombi ishyaka rikomeye kuko yagendanyaga mu manota kugeza kuri 17. Nyuma y'aho, ubwugarizi bwa Shyaka bwagoranye cyane ndetse n'amanota yatsindwaga na Makuto byatumye Police VC isoza iyi seti iyegukanye ku manota 25-21, bityo umukino urangira itwaye amaseti 3-1.
Iyi ntsinzi yahesheje ishema u Rwanda by'umwihariko Musoni Fred, wahise aba umutoza wa mbere w'Umunyarwanda ugejeje ikipe ku mukino wa nyuma w'iri rushanwa, akuyeho agahigo ka Nyirimana Fidele wari wagejeje Gisagara VC muri kimwe cya kabiri mu mwaka wa 2022, ikegukana umudari w'umwanya wa gatatu.
Ku mukino wa nyuma uteganyijwe kuri uyu wa Gatandatu, tariki ya 2 Gicurasi 2026 guhera saa mbiri z'ijoro muri BK Arena, Police VC irahangana na Al Ahly SC yo mu Misiri yasezereye Petrojet SC y'iwabo iyitsinze amaseti 3-0 (20-25, 15-25, 16-25).
Aya makipe yombi agiye guhurira ku mukino wa nyuma nta n'imwe iratsindwa umukino numwe kuva iri rushanwa ryatangira, gusa Al Ahly SC ikaba ifite umwihariko w'uko itaratsindwa iseti n'imwe mu mikino yose imaze gukina.
