Ikipe y'Igihugu ya Espagne yakatishije itike yo gukina imikino ya 1/2 cy'Igikombe cy'Isi nyuma yo gusezerera u Bubiligi ibutsinze ibitego 2-1 mu mukino wa 1/4.
Iyi ntsinzi yabonetse mu minota ya nyuma y'umukino ibifashijwemo na Mikel Merino winjiye mu kibuga asimbura agahita atsinda igitego cy'intsinzi.
Espagne ni yo yabanje gufungura amazamu ku munota wa 30 binyuze kuri Fabian Ruiz wateye ishoti rikomeye nyuma y'uko umunyezamu Thibaut Courtois yari akuyemo umupira wa Dani Olmo.
U Bubiligi bwishyuye iki gitego habura iminota ine ngo igice cya mbere kirangire binyuze kuri Charles de Ketelaere watsindishije umutwe. Iki cyabaye igitego cya mbere Espagne yinjijwe muri iri rushanwa nyuma y'iminota 649 yari imaze itaratsindwa.
Umukino wahinduye isura ku munota wa 71 ubwo umunyezamu Thibaut Courtois wavunitse yavaga mu kibuga arira asimbuwe na Senne Lammens utabashije kwitwara neza mu minota ya nyuma.
Uyu munyezamu wa Manchester United yakuyemo ishoti ryari ritewe na Pau Cubarsi bituma Mikel Merino wari umaze amasegonda 117 gusa yinjiye mu kibuga ahita ashyira umupira mu nshundura ku munota wa 88.
Uku gusezererwa kubabaje gushobora kuba isozwa ry'urugendo rwo gukina Igikombe cy'Isi ku bakinnyi bakomeye b'u Bubiligi barimo Kevin de Bruyne na Romelu Lukaku.
Espagne yageze muri 1/2 bwa kabiri mu mateka yayo nyuma y'umwaka wa 2010, igomba kuzacakirana n'u Bufaransa mu mukino uteganyijwe kubera mu Mujyi wa Dallas.
