Umuholandi Jurgen Zomermaand ukinira Ikipe ya Development Team Picnic Postnl yegukanye Agace ka Gatatu ka Tour du Rwanda 2026, kahagurukiye mu Mujyi wa Huye kerekeza i Kamembe mu Karere ka Rusizi ku ntera y’ibilometero 145,3.
Kuri uyu wa Kabiri, tariki ya 24 Gashyantare 2026, uyu mukinnyi w'imyaka 20 yakoresheje amasaha atatu, iminota 44 n'amasegonda 53, ashyiramo amasegonda 20 ku itsinda ry'abakinnyi bamukurikiye barimo Lucas Van Gils wa Lotto-Groupe Wanty wabaye uwa kabiri na mugenzi we bakinana Matteo Vanhuffel wabaye uwa gatatu.
Gutsinda aka gace byahise bihesha Zomermaand kwambara umwambaro w’umuhondo awambuye Umunya-Espagne Pau Martí Soriano wa NSN Development Team wari wawegukanye ku wa Mbere, kuko we yaje ku mwanya wa 12 asizwe amasegonda 57.
Isiganwa ryahagurutse i Huye saa Tanu zuzuye ryitabiriwe n'abakinnyi 79, nyuma y'uko batandatu bari basezerewe mu Gace ka Mbere naho undi umwe, Dawit Teweldebrhan wa May Stars, akavanwa mu irushanwa azira gufata ku modoka y'ikipe ku wa Mbere.
Bakimara kurenga ibilometero bya mbere batangiriye kubara ibihe mu Gahenerezo, abakinnyi batangira kugerageza gucika igikundi ariko kigahita kibagarura.
Icyakora, ku kilometero cya 18 ahazwi nka Karambi, abakinnyi batanu barimo Mewael Girmay, Muhoza Eric, Vidal, Theiler na Tuyizere Etienne babashije gushyiramo intera.
Mewael Girmay wa Istanbul Team ni we wigaragaje muri iri tsinda, aho yegukanye amanota y'Umusozi wa Mbere i Nyamagabe ndetse yegukana n'amanota ya Sprint ya Mbere i Kigeme, mbere y'uko bafatwa n'igikundi nyuma y'ibilometero 45.
Nyuma yo kwinjira mu ishyamba rya Nyungwe, Umunya-Nouvelle-Zélande Reuben Thompson ukinira Lotto-Groupe Wanty Devo Team yafashe icyemezo cyo kugenda wenyine. Yegukanye amanota y'Umusozi wa Kane n'uwa Gatanu kuri Pindura, ashyiramo ikinyuranyo cyageze ku munota, ariko aza kugira ikibazo cy'igare kimudindiza.
Igikundi cyari kiyobowe na NSN Devo Team y'uwari wambaye umwambaro w'umuhondo, Pau Martí, cyakomeje gukoresha imbaraga kugeza ubwo bafatiye abari imbere. Mu bilometero bya nyuma, irushanwa ryabaye ishiraniro ubwo abakinnyi bageraga mu misozi miremire igana i Rusizi.
Habura ibilometero bitatu gusa ngo isiganwa risozwe, Jurgen Zomermaand yasize bagenzi be agenda wenyine. Yabashije gukomeza uyu muvuduko kugeza yambutse umurongo i Kamembe ari uwa mbere, ashimangira ubuhanga bwe nk'umukinnyi muto ukomoka mu Buholandi.
Nyuma y'uyu mukino, hatanzwe ibihembo bitandukanye aho Zomermaand yahembwe nk'umukinnyi wambaye umwambaro w'umuhondo, uwegukanye agace, n'umukinnyi muto witwaye neza.
Miguel Heidemann yahembwe nk'uwahize abandi mu kuzamuka no muri sprint, Niyonkuru Samuel aba Umunyarwanda mwiza, Yafiet Mulugeta aba Umunyafurika mwiza n'Umunyafurika muto mwiza, Duarte Marivoet ahemberwa kuyobora isiganwa igihe kirekire, naho Eritrea ihabwa igihembo cy'ikipe nziza.
Tour du Rwanda 2026 izakomeza ku wa Gatatu, tariki ya 25 Gashyantare, hakinwa Agace ka Kane kazahagurukira i Karongi saa 12:00 kagasorezwa i Rubavu ku ntera y'ibilometero 127,2.
