Amakipe atatu ahagarariye u Rwanda mu mikino ya Shampiyona Nyafurika ihuza amakipe yabaye aya mbere iwayo muri Volleyball mu bagabo (CAVB Men’s Club Championship 2026), ari yo Police VC, Kepler VC na REG VC yabashije gukatisha itike ya 1/4 cy'irangiza mu gihe Ikipe y'Ingabo z'Igihugu, APR VC, yasezerewe. 

‎

‎Ibi byamenyekanye nyuma y'imikino ya 1/8 cy'irangiza yabaye ku wa Gatatu tariki ya 29 Mata 2026, ikabera mu nyubako za BK Arena na Petit Stade i Kigali. Iyi mikino yasize hamenyekanye amakipe umunani yerekeza muri 1/4 harimo atatu yo mu Rwanda, naho andi atandatu atangira urugendo rwo gushaka imyanya azasorezaho hagati ya 17-24.

‎

‎Mu mikino yose y'amakipe yo mu Rwanda yabereye muri BK Arena, REG VC itozwa na Mugisha Bavuga Benon ni yo yabanje mu kibuga yikura imbere ya Sport-S VC yo muri Uganda, iyiha isomo rya Volleyball iyitsinda amaseti 3-0 (25-18, 25-17, 25-20). Uyu mukino ntiwagoye REG VC dore ko n'umutoza wayo yari azi neza iyi kipe yahoze atoza.

‎

‎Ikipe ya Police VC y'umutoza Musoni Fred yakurikiyeho yitwara neza imbere ya Nigeria Customs Service iyitsinda amaseti 3-0 (25-21, 25-16, 25-21), na yo ibona itike ya 1/4. 

‎

‎Umukino wagoye ikipe yo mu Rwanda ni uwahuje Kepler VC na General Service Unit yo muri Kenya. Kepler yatangiye igorwa cyane no kwakira imipira (reception) binagira ingaruka mu busatirizi, bituma itakaza iseti ya mbere ku manota 23-25. 

‎

Gusa, umutoza Jean Patrice Ndaki Mboulet yafashe ibyemezo byihuse akora impinduka zirimo kwinjiza Ngabo Rwamuhizi Romeo asimbuye Dusenge Wicklif, bituma amakosa agabanuka ndetse abataka barimo Mohamed Radi Krid na Santiago Jair babona uko bitwara neza. 

‎

Ibi byatumye Kepler yikubita agashyi yegukana amaseti atatu yakurikiyeho ku manota 25-23, 28-26 na 25-19, yegukana intsinzi y'amaseti 3-1 bityo yuzuza amakipe atatu y'u Rwanda mu mikino ya 1/4. 

‎

‎Ibyishimo by'Abanyarwanda ntabwo byabaye byose kuko APR VC yasoje imikino yo muri BK Arena ihura n'uruva gusenya imbere ya Fath Union Sports (FUS) yo muri Maroc, iyitsinda amaseti 3-1 (23-25, 18-25, 25-22, 21-25). 

‎

Nubwo APR VC yagerageje kwihagararaho yegukana iseti ya gatatu, yaranzwe n'amakosa menshi arimo kutakira neza imipira ndetse no kubura umusaruro ushimishije ku bataka bayo nka Niyonshima Samuel na Mutabazi Yves. 

‎

‎Ku rundi ruhande, amakipe nka Kenya Ports Authority yatunguranye ikuramo Nemo Stars VC yo muri Uganda ku maseti 3-1 (21-25, 25-22, 22-25, 23-25), kuko iyi kipe yari yasoreje ku mwanya wa gatatu mu Itsinda C yakuyemo iyabaye iya mbere mu Itsinda A. 

‎

Indi mikino ya 1/8 yasize Port Autonome de Douala yo muri Cameroun isezereye Equity Bank VC ku maseti 3-0, Petrojet SC yo mu Misiri isezerera Ghana Army amaseti 3-1, naho Al Ahly SC yo mu Misiri isezerera Kalibi SC amaseti 3-0. 

‎

‎Imikino irakomeza kuri uyu wa Kane tariki 30 Mata 2026, hakinwa imikino ya 1/4 ndetse n’iyo guhatanira imyanya ya 9-16 na 17-24. Umwe mu mikino itegerejwe cyane ni uzahuza Kepler VC na Police VC zo mu Rwanda Saa Sita z'amanywa (12:00), ibi bikaba bivuze ko byanze bikunze u Rwanda ruzagira ikipe imwe muri 1/2 cy'iri rushanwa. 

‎

‎Ikipe izarokoka hagati ya Kepler VC na Police VC izahura muri 1/2 n'izakomeza hagati ya REG VC na Kenya Ports Authority (KPA VC) zizabanza gukina Saa Yine za mu gitondo (10:00). Mu gihe REG VC yaba ibashije gukomeza, u Rwanda rwaba rwizeye kugira ikipe ku mukino wa nyuma, amateka atarigeze abaho muri iri rushanwa. 

‎

‎Indi mikino ya 1/4 izahuza Port Autonome de Douala na Petrojet SC Saa Kumi n'Ebyiri z'umugoroba (18:00), mu gihe FUS izacakirana na Al Ahly SC Saa Mbiri z'ijoro (20:00). APR VC yasezerewe irahura na Kalibi SC Saa Mbiri z'ijoro mu mikino yo guhatanira imyanya ya 9-16, uyu mukino ukaza kubera muri BK Arena.