Ikipe ya Al Ahly SC yo mu Misiri yegukanye igikombe cya Shampiyona Nyafurika y'Amakipe y'Abagabo muri Volleyball ku nshuro ya 17 nyuma yo gutsinda Police VC yo mu Rwanda amaseti atatu ku busa ku mukino wa nyuma wabereye muri BK Arena.
Muri uyu mukino wasoje irushanwa rya CAVB Men’s Club Championship 2026 ryakinwaga ku nshuro ya 47, iyi kipe y'ubukombe muri Afurika yatsinze amaseti 3-0 (25-20, 25-21, 25-22) mu gihe kingana n'isaha imwe n'iminota 21.
Al Ahly SC yasoje iri rushanwa ryamaze iminsi 10 rikinirwa mu Rwanda nta seti n'imwe cyangwa umukino itsinzwe, n'ubwo Police VC ari yo kipe rukumbi yabashije kuyitsinda nibura amanota arenze 20 mu iseti imwe.
N'ubwo yatsinzwe, Police VC yanditse amateka yo kugera ku mukino wa nyuma bwa mbere mu mateka yayo, ikaba n'ikipe ya mbere yo mu Rwanda ibigezeho.
Muri uyu mukino w'ishiraniro, Elphas Maikuva Makuto wa Police VC ni we watsinze amanota menshi agera kuri 17, mu gihe Jose Israel Masso Alvarez wa Al Ahly SC yatsinze 13. Muri iri rushanwa ryose, Makuto yihariye amanota 141 naho Masso Alvarez yinjiza 78.
U Rwanda rwanditse amateka yo kwakira iri rushanwa bwa mbere, ndetse amakipe abiri muri ane yari aruhagarariye abasha gusoreza mu myanya itatu ya mbere.
REG VC yegukanye umwanya wa gatatu itsinze Petrojet Sporting Club yo mu Misiri amaseti 3-1, mu gihe Kepler VC yasoreje ku mwanya wa karindwi naho APR VC ikaba iya 11 mu makipe 24 yitabiriye.
Mu gusoza irushanwa, abakinnyi bane bakinira amakipe yo mu Rwanda na batatu bo mu Misiri bashyizwe mu ikipe y'abakinnyi umunani beza. Aba barimo Frank Shyaka, Melly Brian Kiprui na Irakoze Alain ba Police VC, hamwe na Matui Nicholas wa REG VC.
Igikombe cy'umukinnyi w'irushanwa cyahawe Abdelrahman Elhossiny Eissa wa Al Ahly SC w'imyaka 24. Uyu mukinnyi ureshya na metero 1,9 yegukanye iki gihembo gikomeye nyuma yo gutsinda amanota 60 mu mikino yose y'iri rushanwa.
Leave a Comment