Umukino wa nyuma urahuza REG BBC na Tigers BBC saa Mbiri n'igice. Urabanzirizwa n'uwo guhatanira umwanya wa gatatu uraba saa Kumi n'Ebyiri, APR BBC yesurana na Kepler BBC.
REG BBC yageze ku mukino wa nyuma itsinze Kepler BBC muri 1/2 ku manota 75-58, mu gihe Tigers BBC yo yabigezeho isezereye APR BBC iyitsinze amanota 76-74. Ni imikino yombi yabaye ku wa Gatatu w'iki cyumweru.
Ubwo iri rushanwa ryabaga bwa mbere muri Kanama 2024, APR BBC yegukanye igikombe itsinze REG BBC ku manota 110-92.
Mu bagore, REG BBC ni yo yatwaye igikombe cy'uyu mwaka itsinze APR WBBC amanota 79-52, mu mukino wa nyuma wabereye muri Petit Stade tariki ya 10 Nzeri.
Iyi kipe ya Sosiyete ishinzwe Ingufu yihimuraga kuri APR WBBC yayitwaye iki gikombe ubwo cyakinwaga bwa mbere mu 2024, iyitsinze amanota 72-59.
REG WBBC izahagararira u Rwanda mu Irushanwa rya Zone V rya 2025, kimwe n'iratwara igikombe mu bagabo, hagati ya REG na Tigers.
Leave a Comment