Ikipe ya Police FC ikomeje urugamba rwo guhatanira ibikombe muri uyu mwaka w’imikino, yamaze gusinyisha rutahizamu mushya ukomoka muri Nigeria, Okorie Ekeson, kugira ngo ayifashe gukaza ubusatirizi mu mikino yo kwishyura ya Shampiyona.
Kuri uyu wa Gatanu, tariki ya 30 Mutarama 2026, ni bwo ubuyobozi bwa Police FC bwatangaje ko bwamaze guha amasezerano y’umwaka n’igice uyu musore w’imyaka 21, witezweho gufasha bagenzi be kureba mu izamu.
Uyu mukinnyi mushya yerekanywe ku mugaragaro yakirwa n’Umunyamabanga Mukuru akaba n’Umuvugizi wa Police FC, CIP Umutoni Claudette.
Okorie Ekeson yinjiye muri Police FC avuye muri Nasarawa United yo mu Cyiciro cya Mbere muri Nigeria.
Uyu musore afite inararibonye kuko yanyuze mu yandi makipe akomeye iwabo arimo Shooting Stars, Bayelsa United na Rangers International.
Aje asanga abandi bakinnyi bashya baheruka kongerwa muri iyi kipe y’abashinzwe umutekano muri uku kwezi kwa Mutarama, barimo Rudasingwa Prince, Nshimirimana Ismaël ‘Pitchou’, Isaac Eze na Udahemuka Jean de Dieu.
Aba bose baje kuziba icyuho cy’abandi bakinnyi batandukanye n’ikipe nyuma y’imikino ibanza ya Shampiyona, barimo Muhozi Fred, Ssenjobe Eric na Mugisha Didier.
Okorie asinyiye Police FC mu gihe umwuka ari mwiza mu ikipe, dore ko iheruka gusezerera Rayon Sports iyitsinze igitego 1-0 muri ½ cy’Igikombe cy’Intwari.
Kuri ubu, abasore b’umutoza wa Police FC bahanze amaso umukino wa nyuma uzabahuza na APR FC ku Cyumweru, tariki ya 1 Gashyantare 2026.
Uretse igikombe cy’Intwari, Police FC ifite n’intego yo kwegukana Shampiyona y’u Rwanda, aho kugeza ubu ihagaze ku mwanya wa kabiri n’amanota 34, ikaba izatangira imikino yo kwishyura yakira AS Kigali tariki ya 8 Gashyantare 2026.
Leave a Comment