‎Ikipe ya APR Basketball Club yongereye imbaraga isinyisha Umunyamerika Quinn Cook wigeze kwegukana igikombe cya NBA inshuro ebyiri kugira ngo ayifashe mu mikino ya Basketball Africa League ya 2026.

‎

‎Uyu mukinnyi w'imyaka 32 ukina nka Point Guard yegukanye NBA bwa mbere mu 2018 akinira Golden State Warriors, yongera kugitwara mu 2020 ari kumwe na Los Angeles Lakers.

‎

‎Biteganyijwe ko Quinn Cook azagera mu Mujyi wa Kigali ku wa Gatatu tariki ya 11 Werurwe 2026 yiyunga kuri bagenzi be mu kwitegura iri rushanwa Nyafurika rigiye gukinwa ku nshuro ya gatandatu.

‎

‎Mbere yo kuza mu Rwanda, uyu mukinnyi yanyuze mu yandi makipe akomeye muri Leta Zunze Ubumwe za Amerika arimo Dallas Mavericks, New Orleans Pelicans, ndetse na Cleveland Cavaliers. Yakiniye kandi amakipe yo muri NBA G League, akina no mu Bushinwa nk'uwabigize umwuga.

‎

‎Ikipe y'Ingabo z'Igihugu izatangirira imikino yayo mu gace ka Kalahari Conference kazabera i Pretoria muri Afurika y'Epfo kuva tariki ya 27 Werurwe kugeza tariki ya 5 Mata 2026.

‎

‎Muri iki cyiciro, APR BBC izaba ihanganye n'amakipe arimo Al Ahly Tripoli yo muri Libya, Dar City yo muri Tanzania, Nairobi City Thunder yo muri Kenya, na Petro de Luanda yo muri Angola. Irushanwa riheruka ryegukanywe na Al Ahly Tripoli itsinze Petro de Luanda amanota 88 kuri 67 ku mukino wa nyuma.

‎

‎Kuba imikino ya nyuma ya BAL 2026 izabera i Kigali mu kwezi kwa Gicurasi byatumye ubuyobozi bwa APR BBC bwifuza kwegukana iri rushanwa dore ko umwaka ushize yari yegukanye umwanya wa gatatu.

‎

‎Mu gukomeza kwiyubaka, iyi kipe kandi yaguze abandi bakinnyi barimo Abanya-Sudani y'Epfo Madut Akec na Mangok Mathiang, ndetse n'Umunyamerika Leonard Craig Randall.

‎

‎Yanasinyishije kandi Teafale Marquise Lenard Jr w'imyaka 24 witwaye neza muri BAL 2025 akinira MBB, aho yashyizwe mu ikipe ya kabiri y'irushanwa ndetse no mu ikipe ya mbere y'abugarira neza. 

‎

‎Urutonde ntakuka rw'abakinnyi iyi kipe izakoresha muri uyu mwaka ruriho William Robeyns, Ntore Habimana, Jean Jacques Wilson Nshobozwabyosenumukiza, Axel Mpoyo, Osborn Shema, Dieudonné Ndizeye, Prince Twa, Teafale Marquise Lenard Jr, Mangok Mathiang, Kande Garmine, Madut Akec, Quinn Cook, Johnson Dakari, Leonard Craig Randall, hamwe na Jean Victor Mukama.