Ikipe ya APR HC yegukanye igikombe cya Shampiyona ya Handball y’umwaka wa 2025-26 yigaranzuye Police HC bari bahanganye, iyitsinze imikino 3-2 mu cyiciro cya Kamarampaka.
Iyi kipe y'Ingabo z'Igihugu itozwa na Bagirishya Anaclet yakoze amateka yo kwegukana igikombe nyuma yo gutsindwa imikino ibiri ya mbere igahita yihimura itsinda itatu yakurikiyeho.
Umukino wa gatanu wasobanuye byose warangiye APR HC itsinze Police HC ibitego 31-29. Igice cya mbere cyari cyarangiye APR HC iri imbere n’ibitego 16-14, ibikesha umunyezamu Uwimana Jackson wakuyemo imipira ikomeye yagombaga kuvamo ibitego.
Mu gice cya kabiri Police HC yagerageje kwishyura igera ubwo inganya ibitego 19-19, ibifashijwemo n'abakinnyi barimo Yves Kayijamahe na Kubwimana.
Icyakora APR HC yongeye kuzamura urwego rwayo binyuze kuri Bryan Wakhuka na Rwamanywa Viateur bayifashije gushyiramo ikinyuranyo kugeza umukino urangiye. Iki gikombe kibaye icya kane mu mateka ya APR HC mu gihe Police HC yabuze amahirwe yo kwegukana igikombe cya 11.
Intsinzi ya APR HC isobanuye ko ari yo izahagararira u Rwanda muri Shampiyona Nyafurika ihuza amakipe yabaye aya mbere iwayo izabera muri Angola muri uyu mwaka.
Mu bindi byiciro, ikipe ya E.SC. Nyamagabe yegukanye Shampiyona y’Icyiciro cya Mbere mu Bagore itsinze UR Rukara ibitego 40-23. Shampiyona y’Icyiciro cya Kabiri mu Bagabo yo yatwawe na Mutenderi TSS itsinze TTC de la Salle ibitego 31-24.
Leave a Comment