Ibi byemejwe n'Akanama Nkemurampaka k'Ishyirahamwe ry'Umupira w'Amaguru muri Sudani (SFA) nyuma y'ikirego cyatanzwe na Al Merrikh SC.
SFA yasanze Al Hilal yarashyize mu kibuga abakinnyi umunani b'abanyamahanga nyamara amategeko agenga umupira w'amaguru muri iki gihugu yemerera buri kipe gukinisha batanu gusa.
Muri uyu mukino wa kamarampaka wari wahuje aya makipe yombi Al Hilal SC yari yatsinze igitego 1-0 cyinjijwe na Emmanuel Flomo.
Uyu mwanzuro mushya watumye iyi ntsinzi iteshwa agaciro, Al Merrikh itozwa na Darko Nović ihabwa amanota atatu ya mpaga itsinze ibitego 2-0. Ibi byahise bihesha iyi kipe kuzuza ibikombe 36 bya Shampiyona yegukanye mu mateka yayo.
Uku guhabwa amanota atatu kwatumye Al Merrikh igira amanota 21 ifata umwanya wa mbere ku rutonde rwa Shampiyona mu mikino irindwi yakinwe. Ibi byasize Al Hilal SC isubiye ku mwanya wa kabiri n'amanota 18, ihita inatakaza iki gikombe cya Shampiyona yari yamaze gutwara.
Ubuyobozi bwa Al Hilal SC bwahise butangaza ko butemeranya n'iki cyemezo bwemeza ko cyafashwe n'urwego rutabifitiye ububasha. Iyi kipe yashimangiye ko igiye kwisunga izindi nzego zisumbuyeho mu mupira w'amaguru kugira ngo irenganurwe ihabwe ubutabera.
Aya makipe yombi yari yitabiriye Shampiyona y'u Rwanda mu mwaka ushize w'imikino bitewe n'ibibazo by'umutekano muke biri muri Sudani. Byabaye ngombwa ko akina iyi mikino ya kamarampaka hagati yayo kugira ngo hamenyekane amakipe azasohokera igihugu mu mikino Nyafurika.
