‎Ikipe ya Al Hilal SC yo muri Sudani yatangaje ko yamenyeshejwe na CAF igihe urubanza rwayo ruzaburanishirizwa, ariko iha iyi mpuzamashyirahamwe undi murongo ntarengwa isaba ko umukino wa RS Berkane uhagarikwa cyangwa hagafatwa umwanzuro mbere yawo, bitaba ibyo ikitabaza Urukiko rwa TAS.

‎

‎Binyuze mu butumwa iyi kipe yanyujije ku mbuga nkoranyambaga zayo ku mugoroba wo ku Cyumweru tariki ya 5 Mata 2026, yemeje ko bwa mbere yabonye igisubizo cya CAF kiyimenyesha ko ikirego cyayo kizaburanishwa tariki ya 9 Mata 2026.

‎

Ibi bije nyuma y'inyandiko eshanu zirebana n'iki kirego iyi kipe yari yohereje hagati ya tariki 23 Werurwe na 3 Mata 2026 ariko ntiyabona igisubizo.

‎

‎Nubwo Al Hilal yishimiye iyi ntambwe, yagaragaje ko ifite impungenge zikomeye kuko itamenyeshejwe uruhande rwa RS Berkane cyangwa umukinnyi Hamza El Moussaoui baregwa uko bahagaze muri uru rubanza.

‎

Iyi kipe yagize iti "Ntabwo ikipe yakwitabira iburanisha mu buryo bwiza itabanje kumenya aho izindi mpande zihagaze mbere y'igihe. Uku guceceka ntikwemewe mu mategeko."

‎

‎Ibi byatumye Al Hilal isaba CAF ko bitarenze saa 11:00 z'uyu wa Mbere tariki 6 Mata 2026 ku isaha y'i Cairo, igomba kuba yafashe umwanzuro n'impande zose zikabimenyeshwa, cyangwa umukino wa 1/2 wa RS Berkane na AS FAR uteganyijwe tariki 11 Mata 2026 ukabanza guhagarikwa.

‎

Iyi kipe yabishimangiye iti "Nitudahabwa igisubizo, tuzahita dutanga ikirego mu Urukiko Nkemurampaka rwa Siporo (TAS)."

‎

‎Al Hilal yanagaragaje ko itishimiye kuba iburanisha ryo ku wa 9 Mata 2026 rizayoborwa n'umuntu wasinye icyemezo cyo ku wa 14 Werurwe 2026 cyakuyeho igihano cy'agateganyo cya Hamza El Moussaoui nta shingiro ry'amategeko kandi iyi kipe ntibibimenyeshwe.

‎

Ubuyobozi bwa Al Hilal bwasabye CAF kumukura muri uru rubanza mu maguru mashya kugira ngo yerekane ko yubahiriza amategeko n'ubutabera.

‎

‎Uku gushaka ubutabera gukomeye kuje nyuma y'umukino wo kwishyura wa 1/4 cya CAF Champions League wabereye kuri Stade Amahoro i Kigali tariki ya 22 Werurwe 2026, aho Al Hilal yasezerewe itsinzwe igitego 1-0.

‎

Iyi kipe ishinja RS Berkane gukinisha Hamza El Moussaoui wari wahawe igihano cy'iminsi 30 kubera imiti yongera imbaraga, ikongeraho n'amakosa y'abasifuzi ndetse na VAR yatumye igitego cyayo cyangwa ndetse n'umukinnyi wayo Saeed Ahmed akavunika bikomeye.

‎

‎Kuri ubu Al Hilal Omdurman iyoboye urutonde rwa Shampiyona y'Icyiciro cya Mbere mu Rwanda n'amanota 54, ikaba igaruka mu kibuga yakira Marine FC mu mukino w'umunsi wa 26 uteganyijwe kuri uyu wa Mbere tariki 6 Mata 2026 kuri Kigali Pelé Stadium saa cyenda.