Côte d'Ivoire ibikesha igitego rukumbi cya Amad Diallo yacyuye amanota atatu y'ingenzi itsinda Ecuador igitego 1-0 mu mukino wa mbere w'Itsinda E wabereye kuri Philadelphia Stadium, imbere y'abafana bagera ku 68,274 biganjemo abari bambaye imyenda y'umuhondo bashyigikiye La Tri.
Iki gitego rukumbi cyabonetse ku munota wa 90 ubwo Diallo winjiye mu kibuga asimbura ku munota wa 56 yarekuraga ishoti rikomeye akoresheje ukuguru kw'ibumoso rikaruhukira mu nshundura, umunyezamu Hernan Galindez ntiyabasha kurikuramo. Iki gitego cyaturutse ku mupira mwiza yahawe na myugariro Wilfried Singo wari wazamukanye imbaraga aciye ku ruhande rw'iburyo.
Intsinzi ya Côte d'Ivoire yashyize akadomo ku gahigo ka Ecuador yari imaze imikino 19 ingana n'imyaka hafi ibiri idatsindwa, ndetse n'imikino 12 itinjizwa igitego ku ngoma y'umutoza Sebastian Beccacece.
Iyi kipe yo muri Amerika y'Epfo yatangiye neza uyu mukino, ariko amahirwe yayo agarukira ku giti cy'izamu inshuro eshatu zose binyuze kuri John Yeboah na Alan Minda mu gice cya mbere, hamwe n'ishoti rya Enner Valencia mu gice cya kabiri.
Côte d'Ivoire yari imaze imyaka 12 idakina Igikombe cy'Isi na yo yabonye uburyo bukomeye ku munota wa 52 ubwo Elye Wahi yateraga umupira ukagarurwa n'igiti cy'izamu nyuma yo guhabwa umupira mwiza na Yan Diomande wazonze ba myugariro aciye ku ruhande rw'iburyo.
Côte d'Ivoire itangiranye itsinzi mu Gikombe cy'Isi isanzwe izwiho kutarangwamo icyuho mu bwugarizi kuko yasoje imikino 10 yo gushaka itike y'iri rushanwa itinjijwe igitego na kimwe, ikaba izakina umukino utaha n'u Budage bwanyagiye Curacao ibitego 7-1, ku wa Gatandatu tariki ya 20 Kamena mu Mujyi wa Toronto, mu gihe Ecuador izahura na Curacao ku wa Cyumweru tariki ya 21 Kamena muri Kansas City.
