Mu cyiciro cy'abatarengeje imyaka 16 mu bahungu, irerero rya Bayern Munich mu Rwanda ryatwaye igikombe nyuma yo gutsinda Mahembe FTC ibitego 3-0.
Mu bakobwa b'iki cyiciro, PSG Rwanda Academy yegukanye igikombe itsindiye APE Rugunga kuri penaliti 8-7, nyuma y'uko iminota y'umukino isanzwe yari yarangiye amakipe yombi anganya igitego 1-1.
Ibikombe by'abatarengeje imyaka 14 byombi byatashye mu Ntara y'Iburasirazuba. Mu bahungu, Kayonza Modern yatwaye igikombe itsinze PSG Academy kuri penaliti 4-3, nyuma yo kunganya ibitego 3-3 mu mukino.
Mu bakobwa b'icyo cyiciro, Center For Champions TSS yo mu Karere ka Rwamagana yanditse amateka yo gutwara igikombe idatsinzwe umukino n'umwe, nyuma yo gutsinda Petit Séminaire Baptiste y'i Huye ibitego 3-1.
Buri kipe yatwaye igikombe yahawe na sheki ya miliyoni imwe n'igice y'amafaranga y'u Rwanda (1,500,000 Frw).
Irushanwa rya "FIFA Talent Development Scheme (TDS)", ni gahunda yatangijwe na FIFA mu 2022 ikaba iyoborwa na Arsène Wenger hagamijwe kuvumbura no guteza imbere impano z'abakinnyi bato.
Iri rushanwa ryabaga ku nshuro ya mbere mu Rwanda kuva muri Werurwe uyu mwaka, rikaba ryaritabiriwe n'amakipe 54 y'abakobwa n'abahungu mu byiciro byombi mu gihugu hose.
