APR FC yitwaye neza mu minota ya nyuma, itsinda Marine FC ibitego 2-1 mu mukino w’Umunsi wa Mbere wa Shampiyona wari warasubitswe, wabereye kuri Kigali Pelé Stadium kuri uyu wa Kabiri saa Kumi n'Ebyiri.
Marine FC yatangiye neza umukino, irusha APR FC bigaragara. Ku munota wa 25, yabonye penaliti yashoboraga gutuma bafungura amazamu hakiri kare, nyuma y'ikosa Nshimiyimana Yunussu yakoreye Ndombe Menayame, ariko Mbonyumwami Thaiba ayiteye umunyezamu Ishimwe Pierre ayikuramo.
Iyi kipe yo mu Karere ka Rubavu yakinaga neza yabonye igitego cya mbere ku munota wa 45+1, cyatsinzwe na Mbonyumwami Taiba ku ishoti rikomeye, ku mupira waturutse hagati mu kibuga.
APR FC yakoze impinduka mu gice cya kabiri, ikuramo William Togui, Hakim Kiwanuka, Ssekiganda Ronald na Mugisha Gilbert basimburwa na Djibril Ouattara, Denis Omedi, Lamine Bah na Iraguha Hadji.
Iyi kipe yambara umukara n'umweru yahise itangira kotsa igitutu Marine FC mu buryo bwashoboraga gutanga ibitego, ariko umunyezamu Irambona Vally arigaragaza.
Ku munota wa 69, Djibril Ouattara wahise ahindura umuvuduko w’umukino kuva ageze mu kibuga, yahaye umupira mwiza Denis Omedi, wahise atsinda igitego, bamwe babanza kwibeshya ko habayemo kuraria ariko icyemezo cyigumaho, umukino uba 1-1.
APR FC yakomeje gusatira ndetse inahusha uburyo bwabazwe. Byasabye kurindira umunota wa 90+1 kugira ngo myugariro Ngoy Ilunga yitsinde igitego ku mupira wahinduwe na Iraguha Hadji, gihesha APR FC intsinzi y’amanota atatu.
APR FC yahise igira amanota 14 ifata umwanya wa kane, mu gihe Marine FC igumanye amanota 12 ku mwanya wa gatandatu.
Umunyezamu wa APR FC, Ishimwe Pierre, wagize uruhare rukomeye mu kugumisha ikipe mu mukino harimo no gukuramo penaliti mu gice cya mbere, ni we watowe nk’umukinnyi w’umukino ahabwa ibihembo 100 Frw.
