Ikipe ya Arsenal yatakaje amahirwe yo kuguma ku mwanya wa mbere ku rutonde rwa Premier League yisanzuye n'amanota arindwi ku ikipe ya Manchester City ibakurikiye, nyuma yo kunganya ibitego 2-2 na Wolverhampton Wanderers iri ku mwanya wa nyuma mu mukino warangiye hasigaye ibyishimo n'agahinda.
Muri uyu mukino wabereye kuri Molineux Stadium kuri uyu wa Gatatu, tariki ya 18 Gashyantare 2026, Arsenal yari yizeye intsinzi gusa bihinduka mbere y'uko umusifuzi yerekana iminota y'inyongera.
Tom Edozie, umukinnyi w'imyaka 19, winjiye mu kibuga asimbuye bwa mbere muri Premier League, yishyuriye iyi kipe mu minota y'inyongera, atsinda igitego cya kabiri ari nako umupira wakubise myugariro wa Arsenal, Riccardo Calafiori, ukerekeza mu nshundura.
Arsenal yari yabanje igitego cya mbere ku munota wa gatanu gusa cya Bukayo Saka, wari umaze iminsi 15 adatsinda ndetse uherutse kongera amasezerano y'imyaka itanu.
Ku munota wa 56, Piero Hincapie yatsinze icya kabiri, binyuze ku mupira mwiza yahawe na Gabriel, biha icyizere ikipe ko yamaze kubona intsinzi.
Gusa ibyishimo ntibyatinze kuko ku munota wa 61, Hugo Bueno yatsindiye Wolves igitego cya mbere n'ishoti riremereye.
Ikipe ya Mikel Arteta yagaragaweho kudohoka gukomeye muri uyu mukino, bituma umukino urangira itakaje intsinzi byatumye ikinyuranyo gisigara ari amanota atanu gusa.
Manchester City, ikipe ifite igikombe giheruka, iracyafite umukino w'ikirarane ndetse zombi zizahurira kuri Etihad Stadium tariki ya 18 Mata, umukino ushobora kugaragaza uko isiganwa ry'iki gikombe rizarangira.
Nyuma y'umukino, Umutoza Mikel Arteta yagize ati "Biragoye cyane kubyakira ariko mu gice cya kabiri ntitwagaragaje urwego mu byiciro byose by'umukino, ku rwego rusabwa kugira ngo utsinde umukino muri Premier League, kandi twishyuye ikiguzi."
Arsenal izakomeza urugendo rwayo mu mikino iri imbere aho izacakirana n'abakeba babo bakomeye, harimo kuzasura Tottenham Hotspur kuri iki Cyumweru, tariki ya 22 Gashyantare ndetse inakire Chelsea FC tariki ya 1 Werurwe.
Muri iyi mikino, Ikipe y'Abarashi igomba kwitonda ikirinda kugwa mu makosa nk'ayo yakoze imbere ya Wolves.
