Arsenal yananiwe gutsinda Chelsea ituzuye

Arsenal yananiwe gutsinda Chelsea ituzuye

Arsenal yananiwe gutsinda Chelsea ituzuye

Arsenal yananiwe gutsinda Chelsea ituzuye
Ikipe ya Arsenal ikomeje kuyobora urutonde rwa shampiyona y’u Bwongereza (Premier League), yatahanye inota rimwe i Stamford Bridge nyuma yo kunganya na Chelsea igitego 1-1, mu mukino w’ishiraniro wabonetsemo ikarita y’umutuku ya Moises Caicedo.

Uyu mukino w’umunsi wa 13 wa Premier League wabaye kuri iki Cyumweru, wahuje amakipe yombi asanzwe ahangana mu Mujyi wa London (London Derby), waranzwe n’ishyaka ryinshi, gukubana gukomeye ndetse no gutanga amakarita menshi.

Umukino ugitangira, amakipe yombi yagaragaje inyota yo gushaka igitego, ibintu byatumye umusifuzi akora mu mufuka inshuro eshatu mu minota 13 ya mbere atanga amakarita y’umuhondo.

Ibintu byaje guhindura isura ku munota wa nyuma w’igice cya mbere, ubwo Moises Caicedo ukina hagati muri Chelsea yakoreraga ikosa rikomeye Mikel Merino. Umusifuzi yabanje gutanga ikarita y’umuhondo, ariko nyuma yo kwitabaza ikoranabuhanga rya VAR, yaje gusanga uyu Munya-Equateur yakoresheje imbaraga z’umurengera, ahita amwereka ikarita y’umutuku asohorwa mu kibuga.

Nubwo Chelsea yakinaga ari abakinnyi 10, niyo yafunguye amazamu ku munota wa 48 w’umukino. Ni igitego cyatsinzwe na Trevoh Chalobah n’umutwe, ku mupira mwiza wari uvuye muri koruneri yatewe na Kapiteni Reece James wari wigaragaje cyane muri uyu mukino.

Arsenal yari ifite ibibazo bya ba myugariro bayo ngenderwaho, William Saliba na Gabriel, ntibyafashe umwanya munini ngo yishyure. Mikel Merino yaje gushyiramo igitego cyo kwishyura n’umutwe, ku mupira mwiza yari ahawe na Bukayo Saka.

Mikel Arteta n’abasore be bagerageje gushaka igitego cy’intsinzi bakoresheje amahirwe yo kuba bari bafite umukinnyi umwe w’inyongera, ariko uburyo bwa Chelsea bwo kugarira bagacungira ku bitero shumi (contre-attaques) burabagora, umukino urangira ari 1-1.

Kunganya uyu mukino byafashije Arsenal kugumana umwanya wa mbere n’amanota 35, aho irusha Manchester City ya kabiri amanota atanu. Ku rundi ruhande, Chelsea irarushwa na Arsenal amanota atandatu.

Uyu mukino usize Chelsea yerekanye ko ishobora guhangana n’amakipe akomeye nubwo yaba ifite ibibazo by’abakinnyi bake mu kibuga, dore ko yasoje ifite uburyo bw’ibitego yagerageje mu izamu (shots on goal) bwinshi kurusha Arsenal.

Amakipe yombi azagaruka mu kibuga hagati muri iki cyumweru, aho Arsenal izakira Brentford naho Chelsea ikerekeza ku kibuga cya Leeds United.




























Share this article

Facebook Twitter LinkedIn WhatsApp Instagram
Trending Now