Uyu mukino watangiye Arsenal ifite umuvuduko n'inyota yo gushaka igitego hakiri kare, ibyatumye yiharira umupira kandi ikotsa igitutu ikipe ya Diego Simeone.
Mu gice cya mbere, Eberechi Eze yari hafi gufungura amazamu, ariko ishoti yari ateye mu izamu rigarurwa n'umutambiko. Muri iki gice kandi, Atletico yaje kubona uburyo bwari kubyara igitego nyuma y’ikosa rya David Raya, ariko ku bw'amahirwe make ntibyabakundira.
Amakipe yombi yagiye kuruhuka agwa miswi 0-0.
Mu gice cya kabiri, Atletico Madrid ni yo yabonye uburyo bukomeye cyane bwa rutahizamu w'Umunya-Argentine, Julian Alvarez, ariko ishoti riremereye yatereye inyuma y'urubuga rw'amahina rikubita umutambiko.
Arsenal yagarutse mu gice cya kabiri ifite intego yo gushaka intsinzi ku kabi n'akeza, maze ibigeraho mu buryo bwihuse. Ku munota wa 55, Declan Rice yateye umupira w’umuterekano urimo ubuhanga, myugariro Gabriel Magalhães awushyira mu rushundura n’umutwe, aha Arsenal igitego cya mbere.
Nyuma y’iminota mike, myugariro w'ibumoso, Myles Lewis-Skelly w’imyaka 19 yanyuze hagati mu kibuga hagati y'abakinnyi ba Atletico, aha umupira mwiza Gabriel Martinelli, utajuyaje kubonera ikipe ye igitego cya kabiri.
Arsenal yakomeje gusatira, maze rutahizamu Viktor Gyökeres, wari umaze imikino icyenda adatsinda, abona amahirwe yo kongera kwigaragaza. Yatsinze igitego cya gatatu mu buryo bwari bugoye, nyuma y'aho ashyiramo n’icya kane cyaturutse ku mupira wari uvuye kuri koruneri ya Rice, myugariro Gabriel awuha Gyökeres n'umutwe.
Iyi ntsinzi y’ibitego 4-0 yahesheje Arsenal amanota icyenda mu mikino itatu ya mbere.
Mu yindi mikino yabaye, Barcelona yanyagiye Olympiacos Piraeus ibitego 6-1, Paris Saint Germain itsindira mu Budage Bayer Leverkusen ibitego 7-2, Manchester City itsindira Villarreal muri Espagne ibitego 2-0.
Napoli FC yanyagiriwe mu Buholandi na PSV Eindhoven ibitego 6-2, Inter Milan itsinda Royale Union SG 4-0, Newcastle itsinda Benfica ya Mourninho ibitego 3-0.
Ku munsi w'ejo ku wa Gatatu, hazakinwa imikino irimo Real Madrid izakira Juventus, Chelsea yakire Ajax, Liverpool isure Eintracht Frankfurt, Bayern Munich yakire Club Brugge.
