‎Ikipe ya Bayern Munich yakatishije itike yo gukina imikino ya kimwe cya kabiri cya UEFA Champions League nyuma yo gusezerera Real Madrid iyitsinze ibitego 6-4 mu mikino yombi, mu gihe Arsenal na yo yabonye itike isezereye Sporting CP.

‎

‎Uyu mukino wo kwishyura wabereye kuri Allianz Arena warangiye Bayern Munich itsinze Real Madrid ibitego 4-3.

‎

Umukino watangiranye ishyaka rikomeye kuko ku isegonda rya 35 gusa Arda Guler yafunguye amazamu ku ikosa ry'umunyezamu Manuel Neuer mbere y'uko Aleksandar Pavlović yishyura iki gitego ku munota wa gatandatu.

‎

Guler yongeye gutsindira Real Madrid kuri coup franc ku munota wa 29, ariko Harry Kane yishyura iki gitego ku munota wa 38. Cyari icya 50 atsinze muri uyu mwaka w'imikino.

‎

Kylian Mbappé yongeye guhesha Real Madrid icyizere atsinda igitego cya gatatu ku munota wa 42.

‎

‎Icyizere cya Real Madrid cyayoyotse mu minota ya nyuma ubwo Eduardo Camavinga yabonaga ikarita itukura nyuma yo kubona amakarita abiri y'umuhondo yikurikiranya.

‎

Bayern Munich yahise ibyaza umusaruro ubu bwiganze bw'abakinnyi maze Luis Díaz atsinda igitego cyo kwishyura ku munota wa 89, mu gihe Michael Olise yashimangiye intsinzi atsinda igitego cya kane mu minota y'inyongera cyahesheje iyi kipe yo mu Budage itike yo kuzahura na Paris Saint-Germain.

‎

‎Mu wundi mukino wabaye, ikipe ya Arsenal yo mu Bwongereza na yo yageze muri kimwe cya kabiri nyuma yo kunganya na Sporting CP ubusa ku busa mu mukino wo kwishyura wabereye kuri Stade ya Emirates.

‎

Arsenal yakomeje ishingiye ku gitego 1-0 yari yatsinze mu mukino ubanza wabereye muri Portugal, ikaba itegereje kuzahura na Atlético Madrid mu gushaka itike y'umukino wa nyuma.