CAF yahanishije Al Hilal akayabo nyuma y’imvururu zabereye kuri Stade Amahoro

CAF yahanishije Al Hilal akayabo nyuma y’imvururu zabereye kuri Stade Amahoro

CAF yahanishije Al Hilal akayabo nyuma y’imvururu zabereye kuri Stade Amahoro

CAF yahanishije Al Hilal akayabo nyuma y’imvururu zabereye kuri Stade Amahoro
Impuzamashyirahamwe y’Umupira w’Amaguru muri Afurika (CAF) yafatiye ibihano bikakaye ikipe ya Al Hilal yo muri Sudani, birimo ihazabu y’amafaranga agera ku bihumbi 25 by’Amadolari (hafi miliyoni 34 Frw), biturutse ku mvururu zagaragaye kuri Stade Amahoro nyuma y’umukino wa Champions League wayihuje na MC Alger. 

Ibi bihano byemejwe n'ubuyobozi bwa Al Hilal mu gitondo cyo kuri uyu wa Gatanu, habura amasaha make ngo ikipe yurire indege ku Kibuga Mpuzamahanga cya Kigali yerekeza muri Repubulika Iharanira Demokarasi ya Congo.

Mu ibaruwa yageze ku buyobozi bw’iyi kipe, Komite ishinzwe imyitwarire muri CAF yafashe umwanzuro wo guca ikipe ya Al Hilal amande y’ibihumbi 15 by’Amadolari (hafi miliyoni 20.6 Frw) kubera imyitwarire mibi y’ikipe muri rusange.

 Uretse ikipe, umukinnyi Jean-Claude Girumugisha yahagaritswe imikino itatu, anacibwa amande y’ibihumbi 5 by’amadolari (hafi miliyoni 6.8 Frw). Ibi bihano kandi byageze no kuri Walid Sharshari ushinzwe gusesengura imikinire, na we wahagaritswe imikino itatu, acibwa amande y’ibihumbi 5 by’Amadolari.

Ubuyobozi bwa Al Hilal bwahise bwamagana bwivuye inyuma ibi bihano, buvuga ko ari akarengane gakabije kandi ko bihabanye n’ukuri kwabereye i Kigali. 

Mu itangazo ryasohowe n’Inama y’Ubutegetsi ya Al Hilal, binyuze ku mbuga nkoranyambaga z'ikipe, bagize bati  "Inama y’Ubutegetsi y’Ikipe ya Al Hilal iramenyesha ko yamaganye yivuye inyuma ibi bihano, ibifata nk’ibitarimo ubutabera kandi bibogamye."

Yakomeje igaragaza ko ibyo bihano bidashingiye ku kuri, igira iti "Ibi bihano ntibigaragaza ukuri kw’ibyabaye kandi binyuranye na raporo yakozwe n’ushinzwe gukurikirana umukino hamwe n’ushinzwe umutekano. Raporo zabo zombi zagaragaje ko abagize itsinda rya tekinike n’abakinnyi ba MC Alger ari bo bagaragaje amahane, bigera n'aho biruka kuri Jean Claude bashaka kumukubita."

Kugira ngo barenganure ikipe yabo, ubuyobozi bwa Al Hilal bwahise buha inshingano umunyamategeko wabo witwa Pedro, usanzwe uzobereye mu manza z’imikino, kugira ngo ahite atanga ubujurire muri CAF kuri uyu wa Gatanu.

 Ubuyobozi bwa Al Hilal bwavuze ko bufite amashusho y’umwimerere agaragaza ibyabereye kuri Stade Amahoro, bati "Dufite ibimenyetso simusiga birimo amashusho agaragaza ukuri kutagoretse. Bongeyeho kandi ko biteguye kujyana iki kibazo mu Rukiko rwa Siporo (CAS) igihe cyose CAF itabaha ubutabera.

Mu gitondo cyo kuri uyu wa Gatanu, abakinnyi n’abayobozi ba Al Hilal bahagurutse ku Kibuga Mpuzamahanga cy’Indege cya Kigali berekeza i Lubumbashi. Nyuma yo kwegukana amanota atatu i Kigali batsinze MC Alger ibitego 2-1, iyi kipe yagiye gukina umukino wa kabiri w'amatsinda ya CAF Champions League uzayihuza na FC Saint Eloi Lupopo y'Umutoza Guy Bukasa,ku Cyumweru tariki 30 Ugushyingo kuri Stade Kamalondo.
















Share this article

Facebook Twitter LinkedIn WhatsApp Instagram
Trending Now