Ikipe y’Igihugu ya Nigeria 'Super Eagles' yerekanye imbaraga zidasanzwe inyagira Mozambique ibitego 4-0, mu gihe Misiri 'Pharaohs' byayisabye iminota y’inyongera n’ubuhanga bwa Mohamed Salah kugira ngo isezerere Bénin iyitsinze 3-1, muri 1/8 cya CAN 2025.
Imikino yabaye kuri uyu wa Mbere, tariki ya 5 Mutarama 2026, yasize ibihangange byombi bikatishije itike ya ¼ cy’irangiza, aho Nigeria izahura n’izava hagati ya Algeria na RDC, naho Misiri igategereza izava hagati ya Côte d’Ivoire na Burkina Faso.
Mu mukino wabereye kuri Complexe Sportif de Fes, Nigeria yihanije Mozambique iyitsinda ibitego 4-0, mu mukino waranzwe no kwiharira umupira ku kigero cya 61.2%.
Ademola Lookman yabaye inyenyeri y’uyu mukino, aho yatsinze igitego kimwe akanatanga imipira ibiri ivamo ibindi.
Victor Osimhen na we yongeye kwerekana ko ari rutahizamu ukomeye, atsinda ibitego bibiri, mu gihe Akor Adams yatsinze igitego kimwe akanatanga imipira ibiri.
Igitego cya mbere cya Nigeria cyabonetse ku munota wa 20 gitsinzwe na Lookman ku mupira mwiza yahawe na Adams.
Osimhen yatsinze icya kabiri mbere y’uko igice cya mbere kirangira, naho icya gatatu akibona agitangira igice cya kabiri. Agashinguracumu kashyizweho na Akor Adams ku munota wa 75.
I Agadir, Misiri yahuye n’akazi katoroshye imbere ya Bénin yihagazeho kugeza mu minota y’inyongera.
Marwan Attia yari yafunguye amazamu ku munota wa 69 ku ruhande rwa Misiri, ariko Bénin iza kwishyura habura iminota irindwi ngo umukino urangire (83’), ku gitego cya Jodel Dossou wabyaje umusaruro amakosa y’umunyezamu Mohamed El Shenawy.
Amakipe yagiye mu minota y’inyongera (Extra time), ari bwo Misiri yongeye kwigaragaza.
Ku munota wa 97, myugariro Yasser Ibrahim yatsinze igitego cya kabiri, mbere y’uko Mohamed Salah ashimangira intsinzi ku munota wa 120+4, atsinda igitego cya gatatu ku ishoti ryiza yateye n’ukuguru kw’imoso.
Iki gitego cya Salah cyatumye yuzuza ibitego 10 mu mateka ya CAN, ndetse akomeza gukabya inzozi zo kwegukana igikombe cya mbere cya Afurika hamwe n’igihugu cye, nyuma yo gutsindirwa ku mukino wa nyuma inshuro ebyiri.
Kuri uyu wa Kabiri, tariki ya 6 Mutarama 2026, imikino ya 1/8 irakomeza hakinwa imikino ikomeye: Côte d’Ivoire irikiranura na Burkina Faso, mu gihe Algeria icakirana na Repubulika Iharanira Demokarasi ya Congo.
Abatsinda muri iyi mikino bazahura na Misiri na Nigeria muri ¼ cy’irangiza, mu mikino itegerejwe mu mpera z’iki cyumweru.
