Uyu mukino wo mu Itsinda B wabereye kuri Grand Stade Agadir muri Maroc kuri uyu wa Mbere, tariki ya 22 Ukuboza 2025, wari ukomeye cyane dore ko Zimbabwe yabanje gutungura Misiri iyitsinda igitego hakiri kare.
Misiri yinjiye mu mukino ishaka igitego ndetse yiharira umupira ku kigero cyo hejuru, ariko Zimbabwe iza kubatungura ku munota wa 20 ubwo Prince Dube yafunguraga amazamu ku mupira mwiza yahawe na Emmanuel Jalai.
Igice cya mbere cyaranzwe n’imbaraga nyinshi za Misiri yashakaga kwishyura, ariko igahura n’urukuta rukomeye rw’umunyezamu Washington Arubi w’imyaka 40, wakuyemo imipira iremereye igera kuri icyenda yose muri uyu mukino.
Mu gice cya kabiri, Ikipe y’Igihugu ya Misiri yaje yariye karungu.
Ku munota wa 64, rutahizamu wa Manchester City, Omar Marmoush, yaje kwishyurira Misiri igitego cya mbere nyuma yo gufata umupira ku ruhande rw’ibumoso, agacenga, maze akarekura ishoti rikomeye ryagannye mu rushundura.
Ubwo iminota 90 yari irangiye abantu benshi bakeka ko amakipe yombi agabanye amanota, Mohamed Salah yerekanye itandukaniro.
Ku munota wa mbere w’inyongera (90+1’), Salah utari uherutse kubanza mu kibuga mu mikino ine iheruka muri Liverpool, yarekuye ishoti rikomeye n’akaguru k’imoso, umupira uhita uca mu rihumye umunyezamu Arubi, kiba kiranyoye.
Iyi ntsinzi yari ikenewe cyane kuri Misiri dore ko yari imaze imikino itandatu yikurikiranya mu marushanwa ya CAN iheruka inganya gusa.
Muri uyu mukino, Misiri yateye amashoti 35 yose mu gihe Zimbabwe yari ifite amashoti umunani gusa.
Mu wundi mukino wo muri iri tsinda B, Ikipe y’Igihugu ya Afurika y’Epfo ‘Bafana Bafana’ yatsinze Angola ibitego 2-1.
Oswin Appollis yafunguye amazamu ku ruhande rwa Afurika y’Epfo ku munota wa 21, Angola yishyura ibifashijwemo na Show mbere y’uko igice cya mbere kirangira.
Lyle Foster ukinira Burnley ni we watsinze igitego cy’intsinzi cya Afurika y’Epfo ku munota wa 79, ku ishoti yatereye inyuma y’urubuga rw’amahina.
Kuri ubu Misiri na Afurika y’Epfo ni zo ziyoboye Itsinda B n’amanota atatu buri imwe.
Imikino itaha iteganyijwe ku wa Gatanu, tariki ya 26 Ukuboza 2025 (Boxing Day), aho hitezwe umukino w’ishiraniro uzahuza Misiri na Afurika y’Epfo i Agadir, mu gihe Zimbabwe izisobanura na Angola i Marrakech.
