Ikipe ya Chelsea yashinyaguriye bikomeye mukeba wayo w'ibihe byose Arsenal, nyuma y'iminota mike itakaje Igikombe cya UEFA Champions League. Chelsea yifashishije imbuga nkoranyambaga inyuzaho ubutumwa bwibutsa Arsenal n'abafana bayo ko ku mugabane w'i Burayi bakiri insina ngufi.
Ibi byabaye nyuma y'uko Arsenal itsinzwe na Paris Saint-Germain kuri penaliti 4-3 mu mukino wa nyuma wabereye i Budapest muri Hongrie, kuko iminota 120 yari yarangiye amakipe yombi anganya igitego 1-1.
Arsenal ikimara gutsindwa penaliti ya nyuma, Chelsea ntiyazuyaje kuko yahise ishyira ifoto ku rubuga rwa X igaragaza ibikombe bya Champions League yegukanye ndetse n'icy'Isi cy'Amakipe, iherekejwe n'amagambo ashotora mukeba.
Ubu butumwa bwa Chelsea bwagiraga buti “Nimuze musure mu rugo rw'ibikombe i London. Mutakshe amatike yanyu yo gusura Stade ya Stamford Bridge guhera ubu.”
Nyuma y'amasaha make ishyizeho ubu butumwa bwakiriwe neza n'abafana bayo, iyi kipe yongeye kwandika ibindi isa n'iyerekana ko mbere yatebyaga.
Yagize iti "Birashoboka ko dukwiye indi karita itukura kubera ubutumwa buheruka! Ariko mu by'ukuri, turashimira Arsenal ku kwegukana Premier League n'urugendo rwiza yagize muri Champions League. Twiteguye kuzongera guhangana namwe mu mwaka w'imikino utaha."
Ibi Chelsea yabikoze mu rwego rwo kwibutsa Arsenal ko n'ubwo iherutse kwegukana Shampiyona y'u Bwongereza nyuma y'imyaka 22, Chelsea ikiri yo kipe rukumbi yo mu Mujyi wa London yigeze itwara igikombe cya Champions League, dore ko ibitse bibiri yatwaye mu 2012 no mu 2021. Ku rundi ruhande, Arsenal imaze gutsindirwa ku mikino ya nyuma ibiri irimo uwa 2006 n'uyu wa 2026.
Muri uyu mukino wa nyuma, Arsenal yari yatangiye neza ifungura amazamu ku munota wa gatandatu ku gitego cyatsinzwe na Kai Havertz.
Icyakora, PSG yaje kwishyura ku munota wa 65 binyuze kuri penaliti yatewe neza na Ousmane Dembélé, nyuma y'ikosa Cristhian Mosquera yakoreye Khvicha Kvaratskhelia mu rubuga rw'amahina.
Kuko nta yindi kipe yongeye kureba mu izamu, hiyambajwe penaliti ari na bwo Gabriel Magalhães na Eberechi Eze bazihushije ku ruhande rwa Arsenal, maze Lucas Beraldo atsinda iyatumye PSG isingira igikombe n'ubwo umunyezamu David Raya yari yakuyemo penaliti ya Nuno Mendes.
Umutoza wa Arsenal, Mikel Arteta, yagaragaje akababaro kenshi ashimangira ko gutsindirwa kuri penaliti biryana cyane.
Yagize ati “Ni ugutsindwa gukomeye. Kugera hafi nk'aha ukagwa kuri penaliti birababaje, ariko ndabashimiye cyane ku bw'uyu mwaka w'imikino twagize mu bihe turimo.”
Umukinnyi wo hagati Declan Rice na we yunzemo ati “Birababaje kandi birasenya gutsindirwa ku mukino wa nyuma wa Champions League kuri penaliti, ariko twatanze buri kimwe cyose kandi uwo ni wo mupira.”
Intsinzi ya Paris Saint-Germain yatumye iba ikipe ya kabiri gusa yisubije iki gikombe mu mateka mashya y'iri rushanwa kuva mu 1993, ikurikira Real Madrid.
Ibi kandi byahesheje Umutoza Luis Enrique kwandika amateka yo kuba uwa gatanu utwaye ibikombe bitatu bya Champions League.
Enrique yagize ati “Ndi mu byiyumvo bivanze ibyishimo n'umunaniro, ariko iki ni cyo gihe cyiza cy'umwaka w'imikino. Turacyari abatwaye igikombe, bibiri byikurikiranya, biratangaje cyane.”
