‎Umukinnyi w'Ikipe y'Igihugu y'u Bwongereza na Chelsea, Cole Palmer, yateye utwatsi amakuru yari amaze iminsi amwerekeza muri Manchester United, yemeza ko nta gahunda afite yo kuva mu Mujyi wa Londres.

‎

‎Uyu musore w'imyaka 23 yari amaze iminsi avugwa muri Manchester United, dore ko ari yo kipe yafanaga akiri muto ndetse hakaba hari n'amakuru yavugaga ko yifuza gusubira iwabo mu Mujyi wa Manchester kubera irungu.

‎

Mu kiganiro yagiranye na The Guardian, uyu mukinnyi yahakanye aya makuru yemeza ko atigeze akumbura iwabo ku buryo byatuma ava muri Chelsea yagezemo mu 2023 avuye muri Manchester City aguzwe miliyoni 42.5 z'Amapawundi.

‎

‎Cole Palmer yagize ati "Nta gahunda mfite yo kuva muri Chelsea. Ubusanzwe Manchester ni mu rugo kuko umuryango wanjye wose ni ho uba, ariko sinahakumbuye. Wenda nakumbura iyo maze amezi atatu ntagenda ariko iyo mpageze mbona nta kintu mpafite kidasanzwe."

‎

‎Muri uyu mwaka w'imikino Palmer ntiyagize ibihe byiza ugereranyije n'umwaka we wa mbere kuko amaze gutsinda ibitego 10 n'imipira itatu ivamo ibitego mu gihe mu mwaka ushize yari yatsinze ibitego 27 agatanga imipira 15 yavuyemo ibitego.

‎

Uyu mukinnyi asobanura ko isubira inyuma rye ryatewe n'imvune y'itako yagize muri Nzeri yatumye amara ibyumweru 12 adakina ndetse akaba yaragarutse mu kibuga atarakira neza bityo akagorwa no guhangana n'icyo kibazo.

‎

‎N'ubwo bimeze bityo ariko, uyu mukinnyi wari wongereye amasezerano azamugeza mu 2033 yashimangiye ko we na kapiteni Reece James baherutse kuganira n'abayobozi b'ikipe ku bakinnyi bashya bakeneye kugura kugira ngo ikipe yongere gukomera.

‎

Yavuze ko bafite intego zo kwegukana Igikombe cya FA Cup aho bazahura na Leeds United muri kimwe cya kabiri ndetse no gushaka itike ya UEFA Champions League izabafasha kugura abakinnyi bakeneye.

‎

‎Iki cyizere ku hazaza ha Chelsea cyanashimangiwe n'uko undi mukinnyi wo hagati, Moises Caicedo, na we yamaze kongera amasezerano azamugeza mu 2033 mu rwego rwo gukomeza kubaka ikipe y'igihe kirekire.

‎

‎Kuri uyu wa Gatandatu saa Tatu z'ijoro ikipe ya Chelsea iri ku mwanya wa gatandatu irakira Manchester United iri ku mwanya wa gatatu kuri Stade ya Stamford Bridge.

‎

Uyu mukino uraba ukenewe cyane na Chelsea mu rugamba rwo gushaka itike y'imikino y'i Burayi, dore ko irushwa amanota ane gusa na Liverpool iri ku mwanya wa gatanu utanga itike ya Champions League.