Ikipe y'Igihugu y'u Bufaransa yasezerewe na Espagne mu mukino wa 1/2 cy'Igikombe cy'Isi cya 2026 bitunguranye. Uku gusezererwa gushyize iherezo ku nzozi z'iyi kipe yari yubakiye ku busatirizi bukomeye buyobowe na Kylian Mbappe. Ibi bishyize hasi icyizere cy'umutoza Didier Deschamps cyo gusezera ku kazi yegukanye igikombe cya kabiri mu mateka ye.
Iyi kipe yisanze inyuma bwa mbere muri iri rushanwa nyuma y'ikosa ryakozwe na Lucas Digne ryavuyemo igitego cya Espagne.
Ibibazo by'u Bufaransa byahise byiyongera kuko nyuma y'iminota mike myugariro William Saliba yavuye mu kibuga avunitse.
Ugereranyije n'imikino yabanje, u Bufaransa bwagaragaje urwego rwo hasi cyane imbere y'ikipe ya Espagne yari yihariye umukino.
Espagne yafunze inzira zose zashoboraga gukoreshwa n'abakina basatira barimo Michael Olise, Ousmane Dembele ndetse na Desire Doue. Ibi byatumye ba rutahizamu b'u Bufaransa babona imipira mu bice bitagira icyo bitanga imbere y'izamu rya Espagne.
Ubushobozi buke bw'u Bufaransa bwagaragajwe n'uko bwabonye amashoti atatu gusa agana mu izamu, ndetse mu minota 80 ya mbere nta na rimwe bwari bwateye.
U Bufaransa busigaje gukina umukino wo gushaka umwanya wa gatatu. Uyu mukino uzaha amahirwe Kylian Mbappe yo gukomeza gushaka igihembo cy'umukinnyi watsinze ibitego byinshi muri iri rushanwa. Uyu kandi ni umwanya mwiza kuri uyu rutahizamu wo gukuraho agahigo k'uwatsinze ibitego byinshi mu mateka y'Igikombe cy'Isi.
