Amakuru y'itandukana ry'izi mpande zombi yemejwe na ba nyirayo mu gitondo cyo kuri uyu wa Kane, tariki 16 Ukwakira 2025.
Impamvu nyamukuru zatumye impande zombi zisesa amasezerano mbere y'uko uyu mwaka w'imikino urangira, ni uko uyu musore atari akibona umwanya ubanzamo, guhera mu mpera z'umwaka w'imikino ushize.
Ibi kandi byiyongera ku kuba iyi Kipe y'Igipolisi iherutse gutangaza Manishimwe Djabel nk'umukinnyi wayo mushya, usanzwe ukina uyu mwanya Muhadjiri akinaho.
Mu bihe bitandukanye, Hakizimana w'imyaka 31 yakunze kuvugwa mu ikipe ya Rayon Sports ubwo yabaga asoje amasezerano muri Police FC, ariko ntiyigeze ayerekezamo bitewe n'ibibazo by'amikoro iyi kipe yabaga ifite.
Yamenyekanye akinira Etincelles FC y'iwabo mu mu 2010 mbere yo kwerekeza muri Kiyovu Sports. Uyu mugabo ukina inyuma ya ba rutahizamu kandi yakiniye Mukura VS, AS Kigali yanyunzemo igihe gito ndetse na APR FC.
Uyu mukinnyi amaze gukina hanze y’u Rwanda inshuro ebyiri, aho iya mbere hari mu 2019/20 ubwo yari muri Emirates Football Club yo muri Leta Zunze Ubumwe z’Abarabu.
Hari kandi mu 2022 ubwo yari muri AlKholood FC yo mu Cyiciro cya Kabiri muri Arabie Saoudite, ari na yo yavuyemo asubira muri Police FC mu ntangiriro za 2023.
Magingo aya, Police FC ya Ben Mussa ni iya mbere ku rutonde rwa Shampiyona y'uyu mwaka kuko imaze gutsinda imikino itatu yose imaze gukinwa.
Iyi kipe yambara ubururu bw'ikirere izakira Amagaju FC mu mukino w'umunsi wa kane uzaba tariki 19 Ukwakira 2025, kuri Kigali Pelé Stadium saa Cyenda.
