Abatoza 13 b'Abanyarwanda bita ku bana bakiri bato batoranyijwe kuzerekeza muri Espagne gukarishya ubumenyi mu butoza bafashijwe n'ikipe ya Atlético de Madrid.
Muri aba batoranyijwe harimo abanyabigwi nka Haruna Niyonzima wakiniye Amavubi inshuro zirenga 100, ndetse na Sifa Gloria wahoze ari kapiteni w'Amavubi y'abagore.
Aya mahirwe bayabonye nyuma yo kwitwara neza mu mahugurwa yari amaze iminsi atangirwa mu Rwanda. Yatangwaga n'inzobere zoherejwe n'iyi kipe yo muri Espagne.
Aya mahugurwa yari yitabiriwe n'abatoza barenga 300 baturutse mu bice bitandukanye by'igihugu, hagamijwe kubongerera ubushobozi bwo kuzamura impano z'abakiri bato.
Kuri uyu wa Gatandatu, tariki ya 21 Gushyantare 2026, ni bwo aba batoza batoranyijwe bashyikirijwe impamyabushobozi zabo. Uyu muhango ukaba wabereye kuri Hoteli ya FERWAFA.
Urutonde rw'abandi batoranyijwe ruriho Innocent Murwanashyaka, Iragena Oscarie, Joseph Junior Rutagengwa, Nadia Bugenimana na Blaise Itangishaka.
Hari kandi Nicolas Hakizimana, Darius Hirwa, Damascène Nsengiyumva, Emmanuel Coman Mugisha, Schadrack Nsengayire ndetse na Shema Bravo.
Perezida wa FERWAFA, Shema Fabrice, yasabye aba batoza gukoresha neza aya mahirwe bagakora cyane. Yabasabye kwitegura ku buryo mu myaka ine iri imbere bazaba ari bo batoza Ikipe y'Igihugu 'Amavubi'.
Ubu buryo bwo kongerera ubushobozi abatoza b'imbere mu gihugu ni umusaruro w'amasezerano u Rwanda rwasinyanye na Atlético de Madrid muri Mata 2025 binyuze mu Rwego rw'Igihugu rw'Iterambere (RDB) muri gahunda ya Visit Rwanda.
