‎Ikipe ya Etincelles FC yitwaye neza imbere y'abafana bayo yegukana amanota atatu y'ingenzi nyuma yo gutsinda APR FC ibitego 2-1 mu mukino w'umunsi wa 27 wa Shampiyona y'icyiciro cya mbere mu Rwanda wabereye kuri Stade Umuganda mu Karere ka Rubavu kuri uyu wa Gatandatu.

‎Mbere y'uko umukino utangira, habanje gufatwa umunota wo kwibuka ku nshuro ya 32 Jenoside yakorewe Abatutsi mu 1994.

‎

‎Abakinnyi ba APR FC bari bambaye udutambaro tw'ivu ku kuboko kw'ibumoso, mu gihe aba Etincelles bari bambaye utw'umukara.

‎

‎Etincelles FC yerekanye imbaraga zidasanzwe yikiza APR FC yagumanye amanota 52, mu gihe igikomeza gushakisha uko yakuramo ikinyuranyo cy'amanota atatu irushwa na Al-Hilal SC.

‎

‎Nubwo Etincelles FC yatsinze, iracyari ku mwanya wa 16 n'amanota 25 ku rutonde rw'agateganyo rwa Shampiyona.

‎

‎Ibitego bya Etincelles FC byombi byinjijwe mu gice cya mbere cy'umukino.

‎

‎Iraguha Awadi ni we wafunguye amazamu ku munota wa 28, mbere y'uko Dusabimana Anselme atsinda igitego cya kabiri ku munota wa 31.

‎

‎Igitego rukumbi cya APR FC cyabonetse mu minota y'inyongera y'umukino gitsinzwe na Djibril Ouattara ahawe umupira na Mamadou Sy.

‎

‎Uku gutsindwa kw'Ikipe y'Ingabo z'Igihugu gushimangiye amagambo y'umutoza wa Etincelles FC, Bizimana Abdu bakunze kwita ‘Bekeni’.

‎

‎Mbere y'uyu mukino, uyu mutoza yari yagize ati "Ikibuga twakiriraho numva kimeze nk’ikuzimu ndetse buri kipe tuzajya duhurira hano izajya ihura n’ibibazo."

‎

‎Bekeni yari yaranijeje abakunzi b'iyi kipe ko azatsinda imikino ibiri muri itatu izabahuza na APR FC muri uyu mwaka w'imikino.

‎

‎Mu yindi mikino yakinwe uyu munsi, Gicumbi FC yatsinze AS Muhanga ibitego 2-0 byinjijwe na Bitwayiki Bahati Clement na Niwenshuti Steven.

‎

‎Ikipe ya Mukura VS na yo yatsinze Al Merrikh igitego 1-0 cya Hakizimana Zuberi.

‎

‎Umukino wa Etincelles FC na APR FC washojwe bamwe mu bafana bamereye nabi umusifuzi Twagirumukiza Abdoul bamusaba kurangiza umukino nyuma y'iminota irindwi y'inyongera.