‎Ikipe ya Paris Saint-Germain yo mu Bufaransa yifatanyije n’Abanyarwanda mu kwibuka ku nshuro ya 32 Jenoside yakorewe Abatutsi mu 1994.

Ubu butumwa bwatanzwe kuri uyu wa Kabiri tariki ya 7 Mata 2026, mu gihe Abanyarwanda n’Isi yose batangiye Icyumweru cy’Icyunamo ndetse n’iminsi 100 yo kwibuka inzirakarengane zishwe muri Jenoside yakorewe Abatutsi.

‎

Paris Saint-Germain yifashishije abakinnyi bayo bo mu ikipe y’abagore n’iy’abagabo mu kugenera ubutumwa bw’ihumure Abanyarwanda.

‎

‎Iyi kipe yo mu Murwa Mukuru w'u Bufaransa yagize iti "Twifatanyije n’u Rwanda kwibuka Jenoside yakorewe Abatutsi mu 1994, twunamira inzirakarengane zirenga miliyoni zambuwe ubuzima no kwifuriza gukomera abayirokotse."

‎

‎Abakinnyi bagaragaye batanga ubu butumwa mu ikipe y'abagabo barimo Marquinhos, Désiré Doué, Vitinha, Bradley Barcola ndetse na Khvicha Kvaratskhelia.

‎

Ku ruhande rw'ikipe y'abagore hagaragayemo Paulina Dudek, Mary Earps, Océane Nathalie Toussaint Dit Marseille, Jade Le Guilly hamwe na Baby Jordy Benera.

‎

‎Ubu bufatanye buje bushimangira umubano mwiza uri hagati y'u Rwanda n'iyi kipe, aho mu bihe bitandukanye abakinnyi n’abayobozi bayo basura u Rwanda bakareba ibyiza birutatse, bakaniga amateka yarwo.

‎

Muri izi ngendo, aba bakinnyi basobanurirwa by’umwihariko amateka y’itegurwa n'ishyirwa mu bikorwa ndetse n’ihagarikwa rya Jenoside yakorewe Abatutsi, bakibonera n’uko igihugu cyongeye kwiyubaka.

‎

‎Ubutumwa bwa PSG bukurikira ubwa Arsenal, nk’amwe mu makipe afitanye amasezerano n’Urwego rw’Igihugu cy’Iterambere (RDB) yo kwamamaza ibikorwa by’u Rwanda mu buryo butandukanye binyuze muri 'Visit Rwanda'.