‎Rutahizamu akaba na Kapiteni w'Ikipe y'Igihugu ya Argentina, Lionel Messi, yanditse amateka mashya y'umukinnyi watsinze ibitego byinshi mu mateka y'Igikombe cy'Isi, ubwo yatsindaga ibitego bibiri byahesheje igihugu cye intsinzi ya 2-0 imbere ya Austria ndetse n'itike yo gukina ijonjora rya 32 (1/16).

‎

‎Uyu mukinnyi w'igihangange yafunguye amazamu ku munota wa 38 ku ishoti rikomeye yateye n'ukuguru kw'imoso, ahita aca ku gahigo k'Umudage Miroslav Klose banganyaga ibitego 16 mu bagabo.

‎

 Mu minota y'inyongera y'umukino (94'), Messi yongeye kureba mu izamu ashyiramo igitego cya kabiri cyahesheje Argentina intsinzi idashidikanywaho, ahita yuzuza ibitego 18 bimuha guca no ku gahigo k'Umunya-Brazil, Marta, wari ufite ibitego byinshi mu mateka y'Igikombe cy'Isi mu bagore n'abagabo.

‎

‎Aya mateka adasanzwe yandikiwe kuri Dallas Stadium imbere y'abafana ibihumbi 70, yashoboraga gutangira hakiri kare iyo uyu mugabo adahusha penaliti yari yahawe mu minota icumi ya mbere y'umukino, nyuma y'ikosa ryari rikorewe Lautaro Martínez mu rubuga rw'amahina.

‎

‎Aya mateka akomeye ya Messi ahuriranye n'isabukuru y'imyaka 40 ishize ikindi gihangange cy'Umunya-Argentine, Diego Maradona, atsinze igitego cy'amateka yifashishije ukuboko (Hand of God) mu 1986, ndetse akaba abaye mu gihe Messi yitegura kwizihiza isabukuru y'imyaka 39 y'amavuko.