Ikipe ya Manchester City yakoze ibisa n’ibitangaza ku kibuga cya Anfield, ihatsindira Liverpool ibitego 2-1 mu mukino w’ishiraniro w’Umunsi wa 25 wa Premier League, bituma ikomeza kotsa igitutu Arsenal iyoboye urutonde rwa shampiyona.
Iyi ntsinzi yabonetse mu minota ya nyuma, yafashije ikipe ya Pep Guardiola kugabanya ikinyuranyo cy’amanota irushwa na Arsenal kigera kuri atandatu, mu gihe habura imikino 13 ngo shampiyona irangire.
Byasabye iminota ya nyuma ngo ibintu bihinduke, kuko Liverpool yari yafunguye amazamu ku munota wa 74 ibifashijwemo na Dominik Szoboszlai wateye 'Coup-franc' idasanzwe yo muri metero nka 30, umunyezamu Gianluigi Donnarumma ntiyamenya uko bigenze.
Manchester City ntiyacitse intege kuko ku munota wa 84, Bernardo Silva yishyuye igitego ku mupira mwiza yahawe na Rayan Cherki.
Ibyishimo by’abafana ba Liverpool byahindutse agahinda mu minota y’inyongera (90+3), ubwo Erling Haaland yinjizaga neza penaliti yavuye ku ikosa umunyezamu Alisson Becker yakoreye kuri Matheus Nunes mu rubuga rw’amahina.
Iki gitego cyari icya 21 cya Haaland muri shampiyona y’uyu mwaka.
Umukino warangiye harimo impaka nyinshi n’akavuyo, ubwo Rayan Cherki yatsindaga igitego cya gatatu cya City ku munota wa 13 w’inyongera, ariko ikoranabuhanga rya VAR rikacyanga.
Ibi byavuye ku kuba Szoboszlai yari yakuruye Haaland mbere y’uko umupira ugera mu izamu, byatumye uyu Munya-Hongrie ahabwa ikarita itukura, asohorwa mu kibuga.
Ibi ntibyahinduye ibyavuye mu mukino, bituma City itahana amanota atatu i Anfield ku nshuro ya mbere imbere y’abafana kuva mu 2003, dore ko iheruka kuhatsindira mu 2021 nta bafana bahari kubera COVID-19.
Igice cya mbere cyaranzwe n’umwihariko wa Manchester City yihariye umupira ariko inanirwa kubyaza umusaruro uburyo yabonye binyuze kuri Haaland, Antoine Semenyo na Omar Marmoush.
Liverpool yo yategereje umunota wa 25 ngo ibone uburyo bwa mbere bugana mu izamu, ariko mu gice cya kabiri yaje yahindutse, aho Hugo Ekitike yagiye ahusha uburyo bwabazwe.
Ku ruhande rwa Liverpool, umutoza Arne Slot yagaragaje kutishimira imisifurire, avuga ko ababajwe n’uko ikosa Marc Guehi yakoreye kuri Mohamed Salah atarihaniwe n’ikarita itukura kandi yari asigaranye n’umunyezamu gusa.
Kuri Guardiola, iyi ntsinzi ni ingenzi cyane kuko yatumye bakomeza kugendana na Arsenal, mu gihe Liverpool yo iri ku mwanya wa gatandatu, ikaba irushwa amanota ane na Chelsea ya gatanu.
Manchester City irakurikizaho umukino wa Fulham ku wa Gatatu, mu gihe Arsenal izakina na Brentford ku wa Kane, ibintu bishobora guhindura isura y’urutonde rwa shampiyona.
