Ikipe y'Igihugu y'u Bufaransa yakatishije itike yo gukina imikino ya 1/4 cy'Igikombe cy'Isi nyuma yo gutsinda Paraguay igitego 1-0. Iki gitego cy'agaciro gakomeye cyatsinzwe na rutahizamu Kylian Mbappe yifashishije penaliti mu gice cya kabiri cy'umukino.
Iyi ntsinzi ihesheje u Bufaransa amahirwe yo kuzacakirana na Maroc mu cyiciro gikurikira kuko yari yasezereye Canada iyitsinze ibitego 3-0.
Uyu mukino wabereye mu mujyi wa Philadelphia imbere y'abafana 68.324, waranzwe n'ubwugarizi bukomeye bwa Paraguay yakoreshaga abakinnyi batanu inyumayugarira cyane ndetse n'amayeri yo gutinza umukino.
Nubwo u Bufaransa bwihariye umupira cyane ntibwabashije kubyaza umusaruro amahirwe bwabonye kugeza ku munota wa 70. Ni bwo umusifuzi ukomoka muri Uzbekistan yatanze penaliti nyuma yo kwitabaza ikoranabuhanga rya VAR akabona ko Desire Doue yakorewe ikosa mu rubuga rw'amahina na Diego Gomez.
Mbappe yateye iyi penaliti neza ayishyira mu nshundura nyuma y'uko Ousmane Dembele yari abanje kurinda aho iterwa mu gihe abakinnyi ba Paraguay bashakaga kuhangiza.
Iki gitego cyatumye uyu rutahizamu wa Real Madrid yuzuza ibitego birindwi muri iri rushanwa anganya na Lionel Messi uyoboye abatsinze ibitego byinshi. Ubu Mbappe amaze gutsinda ibitego 19 mu mikino 19 y'Igikombe cy'Isi yose hamwe, aho asigaje igitego kimwe gusa ngo akureho agahigo ka Messi ufite ibitego 20.
Uku gukomeza kw'u Bufaransa kwibukije amateka yo mu 1998 ubwo bwasezereraga Paraguay muri 1/8 buhita bwegukana Igikombe cy'Isi icyo gihe.
