Inama y’Abaminisitiri yateranye kuri uyu wa Gatanu tariki ya 28 Ugushyingo 2025, iyobowe na Perezida wa Repubulika, Paul Kagame, yashyize abayobozi bashya mu nzego zitandukanye, barimo batatu bahawe imyanya ikomeye muri Minisiteri ya Siporo (MINISPORTS).

Ni impinduka zije gushyira iherezo ku gihe cyari gishize hari imyanya imwe n’imwe muri iyi Minisiteri itari irimo abayobozi, ibigiye gufasha iyi Minisiteri kurushaho kwihutisha iterambere rya siporo n’ibikorwaremezo.

Mu itangazo ry’Ibyemezo by’Inama y’Abaminisitiri ryashyizwe ahagaragara, Gilbert Manier yagizwe Umuyobozi Mukuru Ushinzwe Iterambere rya Siporo (Director General of Sports Development), naho Christ Brave Bahire agirwa Umuyobozi Mukuru Ushinzwe Ibikorwaremezo (Director General of Sports Infrastructure).

Undi muyobozi mushya winjiye muri iyi Minisiteri ni Musanabera Rose, wagizwe Umuyobozi Mukuru Ushinzwe Serivisi Rusange (Director General of Corporate Services).

Gilbert Manierahawe wahawe inshingano zo guteza imbere siporo, asimbuye Rwego Ngarambe wahoze kuri uwo mwanya mbere y'uko agirwa Umunyamabanga wa Leta muri iyi Minisiteri. 

Ku ruhande rwa Christ Brave Bahire ugiye gukurikirana ibikorwaremezo bya siporo, yagiye kuri uyu mwanya wari umaze igihe udafite umuyobozi. Awusimbuyeho Alex Redemptus Nshimiyimana, utakibarizwa ku butaka bw’u Rwanda. Uyu mwanya wari umaze hafi umwaka uri ku isoko utarabona uwujyamo.

By’umwihariko kuri Musanabera Rose, we yahawe umwanya mushya utari usanzwe muri iyi Minisiteri, akaba aje kunganira imirimo ijyanye na serivisi rusange z’ikigo.

Kuzuza iyi myanya byitezweho gutanga umusaruro ufatika mu gukemura ibibazo by’ibikorwaremezo bya siporo ndetse no gushyira ku murongo gahunda zo kuzamura impano z’abakiri bato.