Rutahizamu Nestory Irankunda yanditse amateka yo kuba umukinnyi muto w'Umunya-Australia utsinze igitego mu Gikombe cy'Isi ubwo iyi kipe yatunguraga Turukiya ikayitsinda ibitego 2-0 mu mukino wa mbere w'Itsinda D wabereye mu Mujyi wa Vancouver.
Uyu musore w'imyaka 20 n'iminsi 125 yatsinze iki gitego cya mbere yifashishije umupira yahawe na Paul Okon-Engstler, acenga yinjira imbere, mbere yo kurekura ishoti rikomeye ryo hasi mu gice cya mbere cy'umukino.
Kwinjiza iki gitego byatumye ahita akura ku rutonde Brett Holman wari usanganywe uyu muhigo w'umukinnyi muto watsindiye Australia ubwo yari afite imyaka 26 n'iminsi 84 atsinda Ghana mu Gikombe cy'Isi cya 2010.
Irankunda wahoze akinira Bayern Munich, kuri ubu ubarizwa muri Watford ni umwe mu bakinnyi 10 bakinaga irushanwa ry'Igikombe cy'Isi bwa mbere bari bahamagawe n'umutoza Tony Popovic akoresheje ikipe yiganjemo abakiri bato cyane.
Turukiya yari yagarutse mu Gikombe cy'Isi bwa mbere kuva mu 2002 yihariye umukino igihe kinini ariko ibura uburyo bwo kwishyura kuri BC Place kuko abakinnyi barimo Abdulkerim Bardakci, Arda Guler na Zeki Celik bagerageje amashoti akomeye ariko yose akagarurwa n'umunyezamu Patrick Beach wari watunguranye abanza mu kibuga asimbura Mat Ryan kandi ari bwo bwa mbere yakinaga umukino w'irushanwa.
Connor Metcalfe wakinaga hagati mu kibuga ni we washyizemo igitego cya kabiri asonga Turukiya binyuze ku makosa akomeye abakinnyi b'iyi kipe bari bamaze gukora, na we arekura ishoti ryo hasi rikomeye riruhukira mu nshundura.
Mu mikino itaha Australia izahura na Leta Zunze Ubumwe za Amerika ku wa Gatanu tariki ya 19 Kamena, mu gihe Turukiya izahangana na Paraguay ku wa Gatandatu tariki ya 20 Kamena.
