Ikipe ya Paris St-Germain yongeye gushimangira ko ari imwe mu makipe akomeye cyane i Burayi nyuma yo kwegukana igikombe cya UEFA Champions League ku nshuro ya kabiri yikurikiranya mu mukino wa nyuma wabereye i Budapest muri Hongrie, ukarangira PSG itsinze Arsenal penaliti 4-3, nyuma y'uko iminota 120 yarangiye amakipe yombi anganya igitego 1-1.
Uku kwisubiza igikombe kwatumye PSG iba ikipe ya kabiri gusa ibashije kwegukana Champions League yikurikiranya mu mateka y'iri rushanwa kuva ryahabwa iri zina mu 1993, ikurikira Real Madrid yabikoze inshuro eshatu yikurikiranya hagati ya 2016 na 2018.
Muri rusange mu myaka 71 y'iri rushanwa rya kera, PSG ibaye ikipe ya 10 ibashije kwisubiza iki gikombe nyuma yo gutsinda Inter Milan 5-0 ku mukino wa nyuma w'umwaka ushize.
Muri uyu mukino, Arsenal ni yo yafunguye amazamu ku munota wa gatandatu gusa, ku gitego cyatsinzwe na Kai Havertz ku mupira yateye hejuru cyane mu nshundura.
PSG yakomeje gushaka igitego cyo kwishyura ndetse biza kuyihira ku munota wa 65 ubwo Ousmane Dembele yinjizaga penaliti yari yaturutse ku ikosa Cristhian Mosquera yakoreye Khvicha Kvaratshkelia mu rubuga rw'amahina.
Umukino wakomeje gukinanwa ishyaka rikomeye ndetse n'iminota y'inyongera irangira nta kipe yongeye kureba mu izamu ry'indi.
Hiyambajwe penaliti, aho umunyezamu Matvey Safonov wa PSG ndetse na bagenzi be bitwaye neza, by'umwihariko Lucas Beraldo winjije penaliti ya gatanu ya PSG, mu gihe myugariro wa Arsenal Gabriel yateye iye hejuru y'izamu, bikarangira PSG yegukanye intsinzi ya penaliti 4-3.
Uyu musaruro wanditse amateka meza ku mutoza Luis Enrique wa PSG kuko yabaye umutoza wa gatanu gusa mu mateka ubashije kwegukana ibikombe bitatu bya Champions League, nyuma ya Bob Paisley, Carlo Ancelotti, Zinedine Zidane na Pep Guardiola.
Uku kwisubiza igikombe kwa PSG gushimangira imbaraga n'ubudahangarwa bwayo i Burayi kuva Luis Enrique yayigeramo, kuko mu myaka ibiri ishize imaze kwegukana ibikombe umunani muri 10 yahataniye.
Kuba yarabashije gutwara iri rushanwa nubwo yatakaje rutahizamu wayo w'ibihe byose Kylian Mbappe, byerekanye ko ubu iyi kipe igendera ku mikinire y'ikipe nk'uko Enrique yabisezeranyije ubuyobozi ahabwa akazi, aho icyo gihe yabwiye Itangazamakuru ko yahitamo kugira abakinnyi batanu batsinda ibitego 10 aho kugira umwe utsinda 50.
