Perezida wa Repubulika y’u Rwanda, Paul Kagame, yashimiye ikipe ya Paris Saint-Germain yo mu Bufaransa ifitanye ubufatanye na Visit Rwanda, nyuma yo kwegukana Igikombe cya UEFA Champions League ku nshuro ya kabiri yikurikiranya itsinze Arsenal.
Uyu mukino wa nyuma w’umwaka w’imikino wa 2025/2026 wabereye kuri Puskás Aréna mu Mujyi wa Budapest muri Hongrie ku mugoroba wo ku wa Gatandatu, warangiye Paris Saint-Germain itsinze Arsenal penaliti 4-3 nyuma y'uko iminota 120 yarangiye amakipe yombi anganya igitego 1-1.
Abinyujije ku rubuga rwa X nyuma y'uyu mukino, Perezida Kagame yageneye ubutumwa bw'ishimwe aya makipe yombi yahesheje ishema abakunzi bayo yerekana umupira wo ku rwego rwo hejuru.
Yagize ati “Ndashimira umufatanyabikorwa wa Visit Rwanda, Paris Saint-Germain ku Gikombe cya UEFA Champions League yari ikwiye no kuba icyegukanye ku nshuro ya kabiri yikurikiranya.”
Umukuru w'Igihugu yakomeje ashimira ikipe ya Arsenal yagaragaje ishyaka no kwihangana kugeza mu minota ya nyuma y'umukino.
Yongeyeho ati “Ndashimira kandi Arsenal ku kugera ku mukino wa nyuma no guhatana kugeza ku munota wa nyuma ushoboka. Amakipe yombi yateye ishema abakunzi bayo, PSG igaragaza ko ari ikipe nziza kurushaho.”
Muri uyu mukino, ikipe ya Arsenal ni yo yafunguye amazamu hakiri kare ku munota wa gatandatu ku gitego cyatsinzwe na Kai Havertz.
Byasabye gutegereza umunota wa 65 kugira ngo Ousmane Dembélé yishyurire Paris Saint-Germain kuri penaliti yaturutse ku ikosa ryakorewe Khvicha Kvaratskhelia mu rubuga rw’amahina.
Nyuma y'iminota 90 isanzwe n'inyongera y'iminota 30 nta kipe yongeye kureba mu izamu, hiyambajwe penaliti zarangiye myugariro Gabriel Magalhães ahushije iya nyuma yari iya gatanu ku ruhande rwa Arsenal.
Ibi byahesheje intsinzi Paris Saint-Germain isanzwe yamamaza ubukerarugendo bw’u Rwanda kuva mu 2019 kuzageza mu 2028, mu gihe amasezerano Arsenal yari ifitanye n’u Rwanda kuva mu 2018 yo arangiranye n’uyu mwaka w’imikino.
