Umukinnyi wo mu kibuga hagati muri Rayon Sports, Umurundi, Bigirimana Abedi, agiye kumara ibyumweru bitatu adakandagira mu kibuga nyuma yo kugira imvune bita "Plantar Fasciitis".
Iyi kipe yambara ubururu n’umweru niyo yabitangaje kuri uyu wa Gatanu, ibinyujije ku mbuga nkoranyambaga zayo, yemeza ko uyu mukinnyi yamaze gutangira kuvurwa.
Plantar Fasciitis ni imvune ituma uyifite agira ububabare mu bworo bw'ikirenge.
Ibi bije mu gihe n’ubundi hari imikino uyu mukinnyi yajyaga asiba kubera ibibazo by'imvune, dore ko n’umukino uheruka Rayon Sports yatsinzwemo na AS Kigali ibitego 2-0 atawugaragayemo.
Kugeza ubu Rayon Sports iri ku mwanya wa gatanu n’amanota 13. Irasubira mu kibuga kuri uyu wa Gatandatu tariki 29 Ugushyingo, yakirwa na Gicumbi FC kuri Kigali Pelé Stadium saa Cyenda, mu mukino w'umunsi wa cyenda wa shampiyona.
