Ikipe ya Rayon Sports ikomeje urugendo rwo kwiyubaka yongeramo amaraso mashya mu busatirizi, aho yifuza gusinyisha rutahizamu w'Umurundi Nduwimana Franck ukinira Gorilla FC ndetse n'Umunya-Uganda Charles Lwanga wasoje amasezerano muri SC Villa.
Aba bakinnyi bombi bitezweho gukemura ikibazo cy'ibitego bicye iyi kipe yambara ubururu n'umweru yagaragaje mu mwaka w'imikino ushize, nk'uko byatangajwe na Radio Isibo FM.
Nduwimana Franck w'imyaka 24 y'amavuko yigaragaje cyane mu mikino aheruka gukinira Gorilla FC muri Shampiyona y'u Rwanda ya 2025/2026. Uyu musore uca ku ruhande rw'iburyo asatira izamu yakinnye imikino 23 atsinda ibitego bitanu ndetse anatanga umupira umwe wavuyemo igitego, bituma abatoza ba Rayon Sports bamushyira ku isonga mu bakinnyi bashobora kuziba icyuho bafite.
Gukundwa n'iyi kipe kuri Nduwimana ntabwo ari ibintu bishya kuko yatangiye gukurikiranwa mbere y'uko yerekeza muri Gorilla FC mu mpeshyi ya 2024. Icyo gihe yari yagize ibihe byiza cyane muri Musongati FC y'iwabo mu Burundi, aho yayifashije gusoza ku mwanya wa gatatu, ayitsindira ibitego 18 anagatanga imipira umunani yavuyemo ibitego.
Uretse kwitwara neza mu makipe asanzwe, uyu musore ni n'umukinnyi mu Ikipe y'Igihugu y'u Burundi uzwi nk'Intamba mu Rugamba. Yari mu bakinnyi batandatu bakina mu Rwanda baherutse kwitabazwa mu mikino ya gicuti u Burundi buheruka gukina na Maroc tariki ya 26 Gicurasi ndetse na Guinée Équatoriale ku ya 4 Kamena 2026 mu rwego rwo gushaka itike y'Igikombe cya Afurika.
Ku rundi ruhande, ubuyobozi bwa Gikundiro buteze amaso Umunya-Uganda, Charles Lwanga, wamenyekanye ku kazina ka Neymar uherutse gusoza amasezerano muri SC Villa.
Uyu mukinnyi w'imyaka 26 yari yasinyiye iyi kipe y'iwabo amasezerano y'imyaka itatu muri Kanama 2023, ariko yamaze kwemeza ko atazayongera kubera kubura umwanya uhagije wo kubanza mu kibuga.
Muri iyi Shampiyona ya Uganda ya 2025/2026 iheruka gusozwa, yashoboye gutsindira SC Villa ibitego bitandatu gusa; ibyatumye yifuza gushaka ahandi azajya abona umwanya uhagije ndetse akabanza mu kibuga kenshi.
Guhabwa akazina ka Neymar kuri Lwanga byatewe n'umuvuduko afite mu kibuga, ishyaka ndetse n'ubuhanga bw'amacenga agaragaza mu gice cy'ubusatirizi akinamo.
Mbere yo kugaruka muri SC Villa, uyu mukinnyi wabonye izuba tariki 2 Gashyantare 2000, yari yarakiniye KCCA FC hagati ya 2020 na 2023, aho yayitsindiye ibitego 17 mu mikino 55 ya Shampiyona.
Lwanga yanahamagawe ndetse akinira Ikipe y'Igihugu ya Uganda izwi nka Uganda Cranes; ibintu bimuha ubunararibonye bwafasha Rayon Sports mu rugamba rwo gushaka ibitego mu mwaka w'imikino utaha ndetse no mu mikino Nyafurika ya CAF Confederation Cup.
