Umukino watangiye nta muvuduko ufite kuko amakipe yose yakiniraga hagati mu kibuga. Rayon Sports yasaga n'iyiharira umupira kurushaho, ariko ntibareme uburyo bw'ibitego, bitewe n'uko ba rutahizamu bayo, Aziz Bassane, Bagayogo na Habimana Yves bagorwaga no kumenera mu bwugarizi bwa AS Kigali bwarimo Abanya-Nigeria, Franklin Onyeabor na Isaac Ezeh.
Uburyo bukomeye bwa mbere ku ruhande rwa AS Kigali bwabonetse ku munota wa 24, ubwo umunyezamu Mugisha Yves wa Rayon yakuragamo uburyo bwa Rucogoza Eliassa.
Rayon Sports yahise ikora contre-attaque yihuse, ariko Tony Kitoga atera umupira hanze. N'ubwo Sindi Paul yahinduraga imipira myinshi imbere y'izamu ndetse na Bagayoga akagerageza amashoti menshi, iyi kipe yambara ubururu n'umweru yananiwe gufungura amazamu. Igice cya mbere cyarangiye nta gitego na kimwe kibonetse.
Igice cya kabiri cyatangiranye akagufu ku ruhande rwa Rayon Sports, ndetse bari hafi kubona igitego ubwo Bagayogo yashakaga kuroba umunyezamu Niyonkuru Pascal, umupira ukajya hejuru y'izamu.
Buhoro buhoro AS Kigali yatangiye gukurira mu mukino, bituma Rayon Sports ikinira cyane mu gice cyayo.
Byaje gucamo ku munota wa 69, ubwo Ndayishimiye Richard yakoreraga ikosa hafi y'urubuga rw'amahina. Ntirushwa Aime yateye neza uyu muterekano, maze Nshimiyimana Tharcisse wari inyuma y'urubuga rw'amahina arekurira mu nshundura ishoti riremereye, icya mbere kiba kiranyoye.
Rayon yagerageje gushaka uko yagombora binyuze kuri Harerimana Abdelaziz na Ndikumana Asman wari wongeye kugaruka mu kibuga nyuma y'igihe avunitse, gusa bagakora amakosa menshi mu gice cy'ubusatirizi. Iyi kipe kandi yatangiye gukinira imbere cyane ifunguye ikibuga, ibyatumaga inyuma hasigara icyuho.
AS Kigali yaje kubyaza umusaruro uku guhuzagurika, ikajya isatira yifashishije contre-attaques.
Iki gitutu bashyiraga kuri Murera cyaje kubyara umusaruro ku munota wa 84, ubwo Dushimimama Olivier "Muzungu" wagiye mu kibuga asimbuye, yungukiraga ku makosa y'uburangare bw'ubwugarizi bwa Rayon, ashyiramo igitego cya kabiri cyahise gisohora benshi mu bakunzi ba Gikundiro bari muri stade.
Ni umukino wa kabiri wikurikiranya Gikundiro itsinzwe muri Shampiyona, nyuma yo gutsindwa na APR FC ibitego 3-0.
AS Kigali igize amanota umunani ku mwanya wa 11 mu gihe Rayon Sports igumanye amanota 13 ku mwanya wa kane.
Undi mukino wabaye kuri iki Cyumweru warangiye AS Muhanga itsindiye Mukura VS i Huye ibitego 2-1.
