Ikipe ya Rayon Sports yatangaje ko yasinyishije umukinnyi ukina mu kibuga hagati imbere ya ba myugariro, Nisingizwe Christian, wari usanzwe akinira Mukura Victory Sports amasezerano y'imyaka ibiri, aguzwe miliyoni 8 Frw.
Uyu musore w'imyaka 25 y'amavuko uzwi nka Bebeto azanywe no gukemura ikibazo cy'imbere y'ubwugarizi no kubaka umukino mu gihe iyi kipe yambara ubururu n'umweru yitegura umwaka w'imikino wa 2026/2027 ndetse n'irushanwa Nyafurika rya CECAFA Kagame Cup 2026 rizabera i Kigali mu kwezi kwa Nyakanga.
Ubuyobozi bwa Rayon Sports bwari bumaze igihe mu biganiro n'uyu mukinnyi kuva muri Mata uyu mwaka mbere y'uko Shampiyona isozwa, biza kurangira impande zombi zumvikanye nyuma y'uko asoje amasezerano yari afitanye n'ikipe y'i Huye.
Mu kwemeza aya makuru, iyi kipe yanyujije ubutumwa ku mbuga nkoranyambaga zayo igira iti "Twishimiye guha ikaze uyu Nisingizwe Christian w’imyaka 25 y’amavuko wayisinyiye amasezerano y’imyaka ibiri ayikinira hagati mu kibuga yugarira cyangwa akanahakina asatira."
Nisingizwe abaye umukinnyi wa gatatu mushya utangajwe na Gikundiro muri iki cyumweru mu rwego rwo gukomeza urugendo rwo kwiyubaka. Aje yiyongera kuri myugariro Nshutinziza Didier wavuye mu Ikipe ya Gorilla FC ndetse na Ndayishimiye Didier ushobora gukina inyuma ku ruhande rw’iburyo no hagati wavuye muri AS Kigali, bose batangajwe ku wa Gatanu.
