‎Ikipe ya Rayon Sports yatangaje ku mugaragaro ko yasinyishije amasezerano y'imyaka itatu rutahizamu ukiri muto, Muhoza Daniel w'imyaka 18, wavuye muri Etoile de l'Est.

‎

‎Uyu mukinnyi wari umaze igihe avugwa muri Gikundiro, yemejwe mu ijoro ryo ku wa Gatanu, tariki ya 26 Kamena 2026. Gutinda kumutangaza byatewe n'uko yabanje gutunganya ibijyanye n'amasomo ye ndetse n'ikipe ikamushakira irindi shuri azakomerezamo.

‎

‎Muhoza yagize uruhare rukomeye mu gufasha Etoile de l’Est kuzamuka mu Cyiciro cya Mbere, aho mu mwaka ushize w'imikino mu Cyiciro cya Kabiri yatsinze ibitego 13 anatanga imipira 11 yavuyemo ibindi.

‎

‎Aje asanga abandi bakinnyi bashya iyi kipe ikomeje kwiyubaka imaze gusinyisha yitegura umwaka w'imikino wa 2026/2027, barimo Antonio Atisso Kodjo, Charles Tchouplaou, Nizeyimana Mubarak, Nkundimana Fabio, Nisingizwe Christian, Nshuti Didier, Ndayishimiye Didier na Matumona Kanda Abbel.