Ikipe ya Rayon Sports yatangaje ku mugaragaro ko yasinyishije umukinnyi ukina mu kibuga hagati ukomoka muri Niger, Ibrahim Djingarey, mu rwego rwo kongera imbaraga yitegura umwaka w'imikino wa 2026/2027.
Uyu musore w'imyaka 19 wakiniraga US Gendarmerie Nationale yo mu Cyiciro cya Mbere iwabo, yatangajwe nk'umukinnyi mushya wa Gikundiro binyuze ku mbuga nkoranyambaga zayo mu ijoro ryo ku Cyumweru, tariki ya 28 Kamena 2026.
Ibrahim Djingarey abaye umukinnyi wa 10 iyi kipe iguze. Aje guhanganira umwanya n'abandi barimo Nisingizwe Christian na Ndikumana Fabio baherutse kugurwa.
Nubwo akiri muto, guhera mu 2025 yatangiye guhamagarwa mu Ikipe y’Igihugu ya Niger izwi nka "Les Ménas". Yanayikiniye muri CHAN 2025, agaragara mu mikino itatu irimo uwa Guinea yabanje mu kibuga, ndetse n'iyo yasimbuyemo bakina na Algeria na Afurika y’Epfo.
Djingarey asanze abandi bakinnyi bashya Rayon Sports imaze kugura barimo Antonio Atisso Kodjo, Charles Tchouplaou, Matumona Kanda Abbel, Muhoza Daniel, Nizeyimana Mubarak, Nkundimana Fabio, Nisingizwe Christian, Nshuti Didier, na Ndayishimiye Didier.
