Rayon Sports yamaze kwemeza ko Lomami Marcel yongeye kwinjira mu itsinda ry’abatoza bayo guhera kuri uyu wa Mbere, tariki ya 15 Ukuboza 2025.
Uyu mutoza uzi neza iyi kipe, agiye guhita atangira gufatanya na Haruna Ferouz wasigaranye ikipe nyuma y’igenda ry’abanya-Tunisia, Afahmia Lotfi na Azouz Lotfi.
Kugaruka kwa Lomami ku mwanya w’umutoza wungirije bije mu gihe Gikundiro ikomeje ibiganiro byo gushaka Umutoza Mukuru, aho amakuru avuga ko Umufaransa Bruno Ferry ari we uhabwa amahirwe menshi.
Byitezwe ko uyu Mufaransa uheruka gutoza AS Vita Club azagera i Kigali muri iki cyumweru kugira ngo asoze ibiganiro n’iyi kipe yambara ubururu n’umweru.
Lomami Marcel si mushya muri Rayon Sports kuko yayibereye umukinnyi ndetse akayitoza mu bihe bitandukanye, haba nk'umutoza mukuru w'agateganyo cyangwa yungirije.
Mu 2018 yari yungirije Karekezi Olivier, mu 2021 asigarana ikipe nyuma yo gutandukana na Masudi Djuma, naho mu 2022 akorana na Guy Bukasa.
Hanze ya Rayon Sports, yanyuze mu makipe nka Kiyovu Sports, Gasogi United, Gorilla FC, Espoir FC, Vision FC na Etincelles FC avuyemo.
Kuri ubu, Rayon Sports iri ku gitutu cyo kwiyubaka kugira ngo izitware neza mu mikino yo kwishyura ya Rwanda Premier League.
Nyuma y’imikino 11 imaze gukina, iyi kipe ikomoka i Nyanza iri ku mwanya wa gatanu n’amanota 17, ikaba iri kwitegura umukino w’umunsi wa 12 uzayihuza na Gorilla FC mu mpera z'icyumweru.
