Rutahizamu w'Ikipe y'Igihugu y'u Busuwisi, Breel Embolo, yahawe uburenganzira bwo kwerekeza muri Leta Zunze Ubumwe za Amerika gusanga bagenzi be mu myiteguro y'Igikombe cy'Isi cya 2026 nyuma yo gukemurirwa ikibazo cy'ibyangombwa.

‎

‎Uyu mukinnyi w'imyaka 29 ntiyabashije kujyana n'abandi bakinnyi b'u Busuwisi ku wa Kabiri kubera ko ubusabe bwe bw'icyangombwa cy'inzira kizwi nka ESTA cyemerera umuntu kwinjira muri Leta Zunze Ubumwe za Amerika nta viza isanzwe bwari bugisuzumwa.

‎

‎Ibi byatumye yitabira ibiganiro muri Ambasade ya Leta Zunze Ubumwe za Amerika mu Mujyi wa Bern ku wa Gatatu yisobanura, mbere y'uko ahabwa uburenganzira bwo kugenda.

‎

‎Ishyirahamwe ry'Umupira w'Amaguru mu Busuwisi ryemeje aya makuru mu itangazo ryashyize hanze rigira riti "Twamenyeshejwe ko viza ya Breel Embolo yemejwe. Azashobora rero kwerekeza muri Leta Zunze Ubumwe za Amerika. Biteganyijwe ko azasanga ikipe ku wa Gatanu nimugoroba."

‎

‎Icyemezo cyo gusuzuma ibyangombwa by'uyu rutahizamu cyaturutse ku rubanza rwabaye mu 2018 mu Mujyi wa Basel ashinjwa uruhare mu bushyamirane.

‎

‎Embolo yahamijwe icyaha mu 2023 cyo gukora iterabwoba inshuro nyinshi ahanishwa ihazabu isubitswe. Nyuma y'uko urukiko rw'ubujurire rushimangiye iki cyemezo, yafashe umwanzuro wo kutageza ikirego mu Rukiko rw'Ikirenga bituma umwanzuro uba ntakuka mu kwezi kwa Mata.

‎

‎Uyu mukinnyi watsindiye Stade Rennais yo mu Bufaransa ibitego umunani mu mikino 31 ya shampiyona ishize, asanzwe ari inkingi ya mwamba mu Busuwisi kuko amaze gutsinda ibitego 23 mu mikino 85 yahamagawe, akaba yaranakiniye igihugu cye mu Gikombe cy'Isi cya 2018 n'icya 2022.

‎

‎Mu Gikombe cy'Isi cya 2026 kizabera muri Canada, Mexique na Leta Zunze Ubumwe za Amerika, Ikipe y'u Busuwisi izaba ifite icyicaro mu Mujyi wa San Diego.

‎

‎U Busuwisi buzatangira imikino y'Itsinda B buhura na Qatar tariki ya 13 Kamena mu Mujyi wa Santa Clara, bukurikizeho Bosnia na Herzegovina tariki ya 18 Kamena i Inglewood, busoze amatsinda buhura na Canada tariki ya 24 Kamena i Vancouver.