Iyi ntsinzi yagizwemo uruhare rukomeye na Jude Bellingham watsinze ibitego bibiri mu masagonda 98 gusa mbere y'uko igice cya mbere kirangira. Mexique yagerageje kugabanya ikinyuranyo binyuze kuri Julian Quinones watsinze igitego habura iminota itatu ngo amakipe ajye kuruhuka.
U Bwongereza bwakomeje gukina ari abakinnyi 10 guhera ku munota wa 54 nyuma y'uko Jarell Quansah ahawe ikarita itukura azize ikosa rikomeye yakoreye Jesus Gallardo. Ibi ntibyabujije Harry Kane gutsinda igitego cya gatatu kuri penaliti nyuma y'ikosa umunyezamu Raul Rangel yakoreye Anthony Gordon.
Mexique yahise ibona igitego cya kabiri cyinjijwe na Raul Jimenez na we kuri penaliti nyuma y'ikosa Harry Kane yakoreye Brian Gutierrez mu rubuga rw'amahina.
Umunyezamu Jordan Pickford yigaragaje cyane akuramo amashoti akomeye yatewe na Raul Jimenez mu mukino wari wabanje gukererwaho isaha imwe kubera ikirere kibi. Nyuma yo kwihagararaho mu minota 11 y'inyongera, u Bwongereza buzakomeza urugendo bwitegura gucakirana na Norvège mu mukino wa 1/4.
