Ikipe y'Igihugu y'u Bwongereza yananiwe gukatisha itike y'ijonjora rya 32 (1/16) cy'Igikombe cy'Isi cya 2026 hakiri kare, nyuma yo kunganya na Ghana ubusa ku busa (0-0) mu mukino wa kabiri w'Itsinda L wabereye kuri Boston Stadium.
U Bwongereza butozwa na Thomas Tuchel bwari bwitwaye neza imbere ya Croatia mu mukino ubanza, bwatengushywe n'ubwugarizi bukomeye bwa Ghana. Ibi byatumye iyi kipe itegereza iminota 57 yose kugira ngo ibone ishoti rya mbere rigana mu izamu.
Mu gushaka igitego, umutoza Tuchel yinjije mu kibuga Bukayo Saka, Morgan Rogers na Nico O'Reilly. O'Reilly yateye umupira ukubita igiti cy'izamu, mu gihe myugariro Marc Guehi yateye umutwe ugarurirwa ku murongo.
Ku rundi ruhande, Ghana yashoboraga kubona penaliti mu minota ya nyuma ubwo Ezri Konsa yagushaga Prince Kwabena Adu mu rubuga rw'amahina, ariko umusifuzi ntiyayitanga.
Kugeza ubu, u Bwongereza buracyayoboye Itsinda L, ariko bugomba gutegereza umukino wa nyuma buzakina na Panama ku wa Gatandatu kugira ngo bwizere gukomeza. Ku rundi ruhande, Ghana izacakirana na Croatia inyotewe amanota atatu.
